सशस्त्र प्रहरी बल नेपालले रुपन्देही जिल्लाका दुई स्थानबाट करिब १४ लाख रूपैयाँ बराबरको चोरीपैठारीको सामानसहित दुई वटा गाडी नियन्त्रणमा लिएको छ।

प्रहरी बल नेपाल सुरक्षा वेश बुटवलले करिब १४ लाख ४ हजार ७६५ रूपैयाँ बराबरको विभिन्न किसिमका सामानसहित दुई वटा गाडी नियन्त्रणमा लिएको जनाएको छ ।  

बुटवल उपमहानगरपालिका–६ ट्राफिक चोकस्थित सिद्धार्थ राजमार्गबाट करिब ७ लाख ६४ हजार ५ सय ३५ रूपैयाँ बराबरको चिउरा तथा लत्ताकपडा बरामद भएको सशस्त्र प्रहरी बल नेपालका सहप्रवक्ता, डीएसपी शैलेन्द्र थापाले जानकारी दिए ।

बुटवलबाट पोखरातर्फ जाँदै गरेको लु १ ज ३७९६ नम्बरको बोलेरो पिकअप गाडीमा राखी लैजाँदै गरेको ६१ बोरा चिउरा र लत्ताकपडासहित उक्त गाडी नियन्त्रणमा लिइएको हो ।  

यसैगरी, सोही उपमहानगरपालिका–१३ जितगढीस्थित पूर्वपश्चिम राजमार्गबाट करिब ६ लाख ४० हजार २ सय ३० रूपैयाँ बराबरको सामानसहित गाडी नियन्त्रणमा लिइएको हो ।

पश्चिमबाट पूर्वतर्फ आउँदै गरेको लु १ च ५६२० नम्बरको गाडीमा राखी ल्याउँदै गरेको लत्ताकपडा तथा जुत्ताचप्पलसहित उक्त गाडी नियन्त्रणमा लिइएको डीएसपी थापाले बताए । 

बरामद सामान तथा दुईवटै गाडी आवश्यक कारबाहीका लागि भैरहवा भन्सार कार्यालय बेलहियामा बुझाइएको छ । बरामद सामानको मूल्य १४ लाख ४ हजार ७ सय ६५ रूपैयाँ र दुईवटै गाडीको मूल्य २२ लाख गरी जम्मा भन्सार दाखिला मूल्य ३६ लाख ४ हजार ७ सय ६५ रूपैयाँ कायम गरी भन्सार कार्यालयमा बुझाइएको हो ।