२३ असार २०८३, मंगलबार
घरायसी विवादमा धनुषामा आमाले आफ्ना छोराछोरीलाई विष खुवाउँदा तीन बालबच्चाको मृत्यु भएको छ ।
शहीदनगर नगरपालिका– ५ स्थित बासुदेवपट्टी बस्ने ३० वर्षीया बबिता साहले घरको झगडामा सोमबार साँझ शुरूमा दुई छोरी र एक छोरालाई विष सेवन गराएर आफूले समेत विष सेवन गरेकी हुन् ।
इलाका प्रहरी कार्यालय यदुकुवाका प्रमुख एवं प्रहरी निरीक्षक ओमप्रकाश यादवका अनुसार विष सेवनबाट बबिताको ६ वर्षीय छोरा आदित्य, ४ वर्षीया छोरी आकृति र २ वर्षीया छोरी आरुसीको मृत्यु भएको हो ।
बबिताको भने प्रादेशिक अस्पताल जनकपुरमा भेन्टिलेटरमा उपचार भइरहेको छ । स्थानीय सुशील साहकी पत्नी बबिताको पेटमा नौ महिनाको गर्भ रहेपछि अस्पतालमा उनको शल्यक्रिया गरेर जीवितै बच्चा निकालिएको थियो ।
यादवका अनुसार तीन जना बालबालिकाको उपचारको क्रममा मृत्यु भएको हो । बबिताको घरमा यसअघि पनि घरायसी विवादमा झैझगडा हुने गरेको प्रहरीले जनाएको छ ।
प्रहरी निरीक्षक यादवका अनुसार बबिता भेन्टिलेटरमा रहेकाले थप केही खुल्न सकेको छैन । ‘प्रारम्भिक अनुसन्धानमा घरायसी समस्याको कारण बबिताले आफू र बच्चालाई विष खुवाएको भन्ने बुझिएको छ,’ यादवले लोकान्तरसँग भने,‘ बबिता भेन्टिलेटरमा रहेकाले सोधपुछ गर्ने कुरा भएन, पहिला उपचार होस् अनि थप अनुसन्धानको पाटो अगाडि बढाउँछौं ।’
