काठमाडौंको दक्षिणकालीमा बस्दै आएकी एक महिलाले होश गुमाउँदा जागिर त गुमाइन् नै, पारिवारिक नाता सम्बन्ध समेत खल्बलिएको छ ।

वैदेशिक रोजगारीका लागि मेक्सिको जाने क्रममा चिनजान भएका काठमाडौंको गोकर्णेश्वर नगरपालिका– ४ माकलबारीका सुदर्शन पण्डितले ती महिलालाई नारकीय जीवन भोग्न बाध्य पारेका हुन् । 

एक वर्षअघि पण्डितले महिलालाई विदेश जाने क्रममा भिसा लगाउने काममा सहयोग गरेका थिए । 

वैदेशिक रोजगार विभाग जाँदा उनीहरू सँगै हिँड्ने र खाजा खाने गर्दै आए । त्यति नै बेला उनीहरूबीच फोन नम्बर आदानप्रदान भयो ।

पण्डितले शेयर बजारमा लगानी गर्न महिलालाई सुझाव दिए । त्यति मात्रै होइन, शेयर खरिदबिक्रीको सबै काममा सहयोग गरिदिए । 

महिला विदेश गएका बेला उनले पण्डितलाई ‘विदेशबाट शेयर कारोबार गर्न मिलेन, तपाईंले नै खरिद–बिक्री गरिदिनुस्’ भनिन् । महिलाले ३३ नम्बर ब्रोकर (दक्षिणकाली इन्भस्टमेन्ट एन्ड सेक्युरिटिज प्रालि)मा खोलिएको युजर नेम र पासवर्ड पण्डितलाई पठाइदिइन् । 

मेक्सिकोमा काम गरिरहेकी ति महिलासँग पण्डितको दिनदिनै अन्तरंग कुरा हुन थाल्यो । पण्डितले ‘म तिमीलाई मन पराउँछु, तिमीलाई बिहे गर्छु,’ भन्दै फकाउन थाले । तर, महिलाले पण्डितको प्रस्तावलाई सिधै अस्वीकार गरिन् । 

पण्डितले ‘म सँग बिहे गरिनस् भने तेरो बुढालाई झुटा कुराहरू भनिदिन्छु, तेरो परिवार र आफन्तलाई मसँग सम्बन्धमा छ भनिदिन्छु, तेरो परिवारलाई मारिदिन्छु,’ भन्दै महिलालाई धम्की दिए । 

आफ्नो सार्वजनिक बेइज्जत हुने डरले महिलाले पण्डितलाई सम्झाउन थालिन् । पण्डित पुरानै ढिपीमा बसे । उनी नुहाएर बाथरुमबाट निस्किएलगत्तै ह्वाट्सएपमा भिडियो च्याटमा पण्डितसँग बोल्न थालिन् । 

पण्डितले त्यही मौकामा महिलालाई ‘यौनांग नदेखाए छोराछोरी मारिदिन्छु र सार्वजनिक बेइज्ज्यत गरिरिदन्छु’ भन्दै धम्की दिए । आफ्नो इज्जत र प्रतिष्ठामा आँच आउने डरले पण्डितले भने जसरी नै महिलाले आफ्नो यौनाङ्ग देखाइन् । ‘लाइभ’ भिडियोमा गफ गरिरहेका बेला महिलाले यौनांग देखाइदिए पछि पण्डितले ‘स्क्रिन शट’ गरी सुरक्षित राखे ।

महिलाले शेयरको हिसाबकिताब मागिन् । पण्डितले रिसको झोकमा विदेशकै ह्वाट्सएप नम्बरमा उक्त भिडियो र फोटो पठाइदिए । 

मेक्सिकन कम्पनीका हाकिमको मोबाइलमा ती महिलाको नग्न फोटो र भिडियो आएपछि उनीमाथि केरकार भयो । कम्पनीबाट ती महिला निकालिइन् । त्यसपछि उनी नेपाल फर्किइन् । 

महिलाका श्रीमानले किन यति छिटो आएको भनेर प्रश्न गरे । उनी बताउन बाध्य भइन् । त्यसपछि श्रीमानकै सल्लाहमा उनी नेपाल प्रहरीको साइबर ब्यूरोमा उजुरी दिन पुगिन् ।

ब्यूरोले पण्डितलाई भोटाहीटीबाटै पक्राउ गर्‍यो । पण्डितले आफ्नो कर्तुत सहजै स्वीकार गरे । यही वैशाख २१ गते पण्डितविरुद्ध मुद्दा दर्ता भएको दीपकराज अवस्थीले जानकारी दिए । 

ब्यूरोका प्रवक्ता एवं प्रहरी उपरीक्षक अवस्थीका अनुसार पीडित महिलाले रीतपूर्वक जाहेरी दिएपछि पण्डितलाई पक्राउ गरेर सरकारी वकिल कार्यालयमार्फत काठमाडौं जिल्ला अदालतमा विद्युतीय कारोबार ऐनअन्तर्गतको कसुरमा मुद्दा चलाइएको छ ।