१० साउन २०८३, आइतबार
निजामती सेवामा अतिरिक्त सचिव राख्ने प्रावधानसहित संघीय निजामती विधेयक संसदीय समितिबाट पारित भएको छ । शुक्रवार बसेको राज्य व्यवस्था तथा सुशासन समितिले संघीय निजामती विधेयकलाई टुंगो लगाएको हो ।
समिति सचिव सुरजकुमार दुराले अतिरिक्त सचिव राख्ने विषयमा सहमति जुटेको लोकान्तरलाई जानकारी दिए । अधिकृत १३औं, १४औं र १५औं तहलाई राजपत्रांकित विशिष्ट श्रेणी भनिएको छ ।
नयाँ व्यवस्थाअनुसार अब मुख्य सचिवको वरीयता अधिकृत १५औं तह हुनेछ । सहसचिवभन्दा माथि १३औं तहमा अतिरिक्त सचिव र १४औं तहमा सचिवको वरीयता कायम गरिएको छ ।
अतिरिक्त सचिव राख्ने नराख्ने विषयमा संसदीय समितिमा लामो बहस भएको थियो । विधेयकको नयाँ प्रावधानमा कर्मचारी अवकाशको उमेरहद ६० वर्ष पुर्याइएको छ ।
यसअघि अवकाशको उमेर ५८ वर्ष रहेकोमा अब ६० वर्षमा मात्र कर्मचारीले अवकाश पाउने छन् ।
प्रतिवेदनमा सबै सदस्यको हस्ताक्षरपछि अब बस्ने प्रतिनिधि सभा बैठकमा सभापति रामहरि खतिवडाले प्रतिवेदन पेश गर्नेछन् ।
निजामती विधेयकमा कर्मचारीलाई आन्तरिक पर्यटनका लागि विदा दिने प्रस्ताव समेत गरिएको समिति सचिव दुराले जानकारी दिए ।
