गायक तथा संगीतकार सुशील विश्वकर्माले नेपाल आएको बेला दुईवटा गीत रेकर्ड गरेर एक साथ दर्शकमाझ ल्याएका छन् । काठमाडौंमा विशेष कार्यक्रमगरी वरिष्ठ गायिका मीरा राणा र वरिष्ठ संगीतकार दीपक जंगमले दुवै गीतको पोष्टर सार्वजनिक गरेका हुन् । 

सो अवसरमा दुई गीत पछ्यौरीको छेउ...र भुतुक्क भएँ नि...को भिडियो पनि सार्वजनिक गरिएको थियो । दुवै गीतको भिडियोलाई गायक एवं संगीतकार सुशीलले आफ्नै अफिसियल च्यानलमार्फत् सार्वजनिक गरेका हुन् । 

कार्यक्रममा विमोचित गीत ‘भुतुक्कै भएँ नि’मा राजेश गुरुङको रचना र महेश थुलुङको स्वर छ । रोमाञ्चक भावको यो गीतको भिडियोमा अभिनेता यसराज गराच र मोडल सुस्मिता बुढाथोकीको अभिनय छ । यो गीतको संगीत सुशील विश्वकर्माले नै गरेका हुन् ।

यस्तै, अर्को गीत पछ्यौरीको छेउमालाई सुशीलले नै गाएका छन्  । यो गीतमा उनलाई गायनमा बिबी अनुरागीले साथ दिएका छन् । यो गीतलाई हेमन्त विवशले लेखेका हुन्। नदी किनारमा गिट्टी कुटेर जीवन यापन गरिरहेका मजदुरहरूको व्यथामा यो गीत आधारित छ । 

गीतको भिडियोमा गोविन्द प्रभात, निरु खडका, कृष्ण रसाल, रोशन श्रेष्ठ, श्रेया नापितले अभिनय गर्नुभएको छ । यी दुवै गीतको भिडियोलाई कृष्ण रसालले निर्देशन, केशव कोइरालाले कोरियोग्राफी, राजेन्द्र पाण्डेले छायांकन एवं सम्पादन गरेका हुन् । 

गीत सार्वजनिक कार्यक्रममा सबैलाई स्वागत गर्दै भिडियो निर्देशक कृष्ण रसालले दुई फरक शैलीका गीतको निर्देशन गर्दा फरक अनुभव भएको सुनाए । विगत चार दशकदेखि गायन, संगीत र बाँसुरी वादनमा क्रियाशील रहँदै आएका सुशीलले निकै राम्रो गीत गाएको पनि उनको भनाइ थियो ।

गायक एवं संगीतकार सुशीलले सबैलाई धन्यबाद दिँदै केही समय यताबाट आफू अमेरिकामा रहँदै आए पनि त्यहाँ रहेका नेपालीलाई गीत संगीत नयाँ पुस्तालाई सिकाउँदै आएको बताए । आफू जहाँ रहे पनि संगीत सिर्जना र गायनलाई निरन्तरता दिने उनले बताए ।

कार्यक्रममा गायिका लोचन भट्टराईले सुशीलको गायनको प्रशंसा गरेका थिए । गीतकार संघ नेपालका अध्यक्ष वसन्त वित्यासी थापाले सुशीलको संगीत र गायन दुवै राम्रो भएको बताए । संगीतकार दीपक जंगमले सुशीलले सुन्दा आनन्द आउने गीत बजारमा ल्याएको भन्दै उनलाई यस्ता संगीत सिर्जनालाई निरन्तरता दिन सुझाब दिए । भिडियो निर्देशक रसालले पनि गीतलाई भिडियोमा जीवन्तसँग ढालेको जंगमले बताए ।

गायिका मीरा राणाले रेडियो नेपालमा समूहमा गीत गाउने गरेका सुशीलले एकल रूपमा पनि राम्रो गीत गाएको बताइन् । सुशीलको गायन पछिल्लो समय राम्रो हुँदै गएको उनले जिकिर गरिन् । संगीत सृजनासँगै उनले सुशीललाई गाउन पनि सल्लाह दिइन् ।