१२ असार २०८३, शुक्रबार
बेंगलुरुस्थित चिन्नास्वामी रंगशालाबाहिर आरसीबीको जीतको उत्सव मनाउने क्रममा मच्चिएको भागदौडमा कम्तीमा ११ जनाको मृत्यु भएको छ । घटनामा कम्तीमा ३३ जनाभन्दा बढी घाइते भएका भारतीय सञ्चारमाध्यमले जनाएका छन् ।
आईपीएलको इतिहासमा १८ वर्षपछि पहिलोपटक उपाधि जितेको खुसीमा र आरसीबी टोलीको स्वागत गर्न लाखौं संख्यामा युवा, महिला, पुरुष र वृद्धवृद्धासमेत सडकको छेउमा भेला भएका थिए।
एक वरिष्ठ प्रहरी अधिकारीका अनुसार, चिन्नास्वामी स्टेडियमको गेटमा मच्चिएको भागदौडमा ११ जनाको ज्यान गएको छ ।
‘त्यतिबेला स्टेडियमको मूल गेट खुलेको थिएन । हजारौं मानिस सानो गेटबाट जबर्जस्ती पस्ने प्रयास गरिरहेका थिए । त्यही क्रममा भागदौड मच्चिएको हो’, उनले भने ।
उत्सव मनाउन करिब १ लाख मानिस आउने अनुमान गरिएको थियो, तर भीड करिब २ लाखसम्म पुगेको थियो । स्टेडियम वरपर पनि ठूलो संख्यामा मानिसहरू जम्मा भएका थिए ।
घटनाप्रति प्रधानमन्त्री नरेन्द्र मोदीले दु:ख व्यक्त गरेका छन् । उनले घाइतेहरूको शीघ्र स्वास्थ्यलाभको कामना समेत गरेका छन् ।
आरसीबी टोली विशेष विमानमार्फत् पुरानो एचएएल विमानस्थलमा अवतरण गरेको थियो । जहाँ कर्नाटक राज्यका उपमुख्यमन्त्री डीके शिवकुमारले टोलीको स्वागत गरेका थिए र टोलीलाई जुलुसमार्फत होटलतर्फ लगिएको थियो।
स्वागत समारोहअघि राज्यपाल थावरचन्द गहलोत, मुख्यमन्त्री सिद्धरामैय्या र अन्य मन्त्रीहरूले टोलीलाई बधाई दिएका थिए । त्यसपछि टोली फेरि जुलुसमार्फत स्टेडियम जानुपर्ने कार्यक्रम तय गरिएको थियो ।
शहरका विभिन्न भागबाट १८ नम्बर लेखिएको जर्सी लगाएका समर्थकहरू मोटरसाइकल, कारलगायत सवारीसाधनमार्फत स्टेडियमतर्फ ओइरिएका थिए । मेट्रो रेलहरू यति खचाखच भरिएका थिए कि धेरैजना चढ्न नै पाएनन् । उनीहरूले ‘आरसीबी... आरसीबी...’ भन्दै नाराबाजी गरिरहेका थिए ।
