१९ असार २०८३, शुक्रबार
प्रमुख प्रतिपक्षी नेकपा (माओवादी केन्द्र)ले संसद्को गतिरोध अन्त्य गर्न अधिकतम सकारात्मक प्रयास गर्ने भएको छ । बिहीबार बिहान बसेको माओवादी पदाधिकारी बैठकले गतिरोध अन्त्य गर्न सरकार र विपक्षी दलहरूसँग सिर्जनात्मक र रचनात्मक ढंगले छलफल गर्ने निर्णय गरेको पार्टी प्रवक्ता अग्निप्रसाद सापकोटाले जानकारी दिए ।
उनका अनुसार भिजिट भिसा प्रकरणमा छानबिन गर्नुपर्छ भन्ने माओवादीको मुख्य माग छ । त्यसका लागि सरकारले कस्तो वातावरण बनाउँछ, त्यसअनुसार अघि बढ्ने उनले बताए ।
‘हामी जिम्मेवार प्रतिपक्ष भएकाले निकास निकाल्न हाम्रो तर्फबाट रचनात्मक हिसाबले अधिकतम जोड रहने छ,’ बैठकपछि पार्टी प्रवक्ता अग्नि सापकोटाले भने, ‘निकास निकाल्न सिर्जनात्मक र रचनात्मक ढंगले लाग्नेछौं । सरकार र विपक्षी दलहरूसँग छलफल हुन्छ । मुख्य कुरा छानबिन हो, व्यक्ति विशेषमा हाम्रो त्यति धेरै ध्यान छैन । आज पनि सरकारसित र अर्कोतिर विपक्षी पार्टीहरूसित पनि कुराकानी गर्नुपर्ने छ । सकेसम्म छानबिनका लागि वातावरण बनाउनुपर्छ र सदनमा छलफलको वातावरण पनि हुनुपर्छ भन्ने विषयमा आजको छलफलमा निष्कर्ष निक्लेको छ ।’
भिजिट भिसा प्रकरणमा गृहमन्त्री रमेश लेखकसमेत मुछिएको भन्दै उनको राजीनामा माग्दै माओवादीसहित रास्वपाले संसद् अवरुद्ध गर्दै आएका छन् । संसदको गतिरोध नहट्दा बजेटमाथिको छलफल शुरू हुन सकेको छैन ।
आफूविरूद्ध सर्वोच्च अदालतले दिएको उत्प्रेषण आदेशबारे अहिले नै टिप्पणी गर्ने बेला नभएको उनले बताए । अदालतको पूर्णपाठ आएपछि पुरै अध्ययन गरेर मात्रै यसबारे बोल्न सकिने उनको भनाइ छ ।
सर्वोच्च अदालतले बुधबार द्वन्द्वकालीन घटनामा माओवादीका उपाध्यक्ष सापकोटाविरूद्ध परेको उजुरीमाथि अनुसन्धान अघि बढाउन आदेश दिएको थियो । प्रधानन्यायाधीश प्रकाशमान सिंह राउतसहित सपना प्रधान मल्ल, कुमार रेग्मी, मनोजकुमार शर्मा र कुमार चुँडालको संवैधानिक इजलासले उक्त आदेश जारी गरेको थियो।
