१६ असार २०८३, मंगलबार
मन्त्रिपरिषद्ले गरेको निर्णयमा अख्तियार दुरुपयोग अनुसन्धान आयोग प्रवेश गरेर भ्रष्टाचार मुद्दा दायर गरेको छ ।
काभ्रेमा रहेको जग्गा पतञ्जली आर्युवेदलाई दिने २०६६ पुस २९ गते मन्त्रिपरिषद् बैठकको निर्णयमा अनुसन्धान गरी अख्तियारले तत्कालीन प्रधानमन्त्री माधवकुमार नेपालविरुद्ध भ्रष्टाचार मुद्दा दायर गरेको हो ।
अख्तियारले १८ करोड ५७ लाख बिगोसहित पूर्वप्रधानमन्त्री नेपालविरुद्ध भ्रष्टाचार मुद्दा दायर गरेको हो ।
मन्त्रिपरिषद्को निर्णयलाई लिएर पूर्वप्रधानमन्त्रीलाई भ्रष्टाचार मुद्दा लागेको यो पहिलो नजिर हो ।
अख्तियारलाई छल्न मन्त्रिपरिषद्बाट निर्णय गराउने प्रवृत्ति बढिरहेको समयमा अख्तियारले मन्त्रिपरिषद्को निर्णयमा समेत मुद्दा दर्ता गरेको हो । अख्तियारले नेपालसँग घरमै गएर बयान लिएको थियो ।
मन्त्रिपरिषद्को निर्णय सदन गर्ने तत्कालीन मुख्यसचिव स्व. माधव घिमिरेकी पत्नी कमलाविरुद्ध समेत भ्रष्टाचार मुद्दा दायर गरिएको छ ।
२०६९ सालमा बनेको चुनावी मन्त्रिपरिषद्मा गृहमन्त्री बनेका घिमिरेको त्रिशूलीमा भएको गाडी दुर्घटनामा मृत्यु भएको थियो ।
अख्तियारले तत्कालीन कानून मन्त्री प्रेमबहादुर सिंह, तत्कालीन भूमिसुधार मन्त्री स्व. डम्बर श्रेष्ठका छोरालाई समेत प्रतिवादी बनाएको छ । भ्रष्टाचार मुद्दा लागेपछि पूर्वप्रधानमन्त्री नेपालको सांसद पद स्वतः निलम्बनमा परेको छ । उनी रौतहटबाट प्रत्यक्ष चुनाव जितेका थिए ।
