इजरायली सेनाले इरानको राजधानी तेहरानको तेस्रो प्रशासनिक जिल्लामा रहेका बासिन्दाहरूलाई तत्काल उक्त क्षेत्र खाली गर्न निर्देशन दिएको छ । 

सेनाको भनाइमा, उक्त क्षेत्रमा इरानी सैन्य संरचना रहेको र त्यसमाथि लक्षित कारबाही गरिने तयारी भइरहेको छ ।

इजरायल डिफेन्स फोर्स (आईडीएफ)ले एक्स मा जानकारी दिँदै ‘आगामी केही घण्टाभित्र’ कारबाही हुने चेतावनी दिएको छ । उसले सर्वसाधारणलाई सुरक्षित स्थानमा जान आग्रह गरेको हो ।

तेहरानको तेस्रो जिल्ला समृद्ध र बाक्लो जनसंख्या भएको क्षेत्र हो । यहाँ आवासीय बस्तीहरूसँगै सरकारी संरचना तथा इस्लामिक रिपब्लिक अफ इरान ब्रडकास्टिङका मुख्य कार्यालयहरू समेत रहेका छन्।

इजरायली रक्षा मन्त्री इस्राइल कात्जले सोमबार एक वक्तव्य जारी गर्दै ‘इरानी प्रचार र भड्कावको मुख्य स्रोत अब अन्त्यतर्फ उन्मुख छ’ भनेका छन् । उनले नजिकका बासिन्दाहरूको स्थानान्तरण प्रक्रिया शुरू भइसकेको पनि जनाएका छन् । यद्यपि, उनले उल्लेख गरेको ‘स्थानान्तरण’ आईआरआईबी सञ्जालसँग सम्बन्धित हो वा तेस्रो जिल्ला नै भन्ने विषय प्रस्ट खुलाइएको छैन ।