०८ साउन २०८३, शुक्रबार
इजरायली युद्धक विमानले इरानको राजधानी तेहरानमा मंगलबार रातभर र बुधबार बिहानसम्म आक्रमण गरेपछि स्थिति थप जटिल बन्दै गएको छ ।
इजरायली सेनाका अनुसार आक्रमणमा युरेनियम सेन्ट्रिफ्युज बनाउने कारखाना र मिसाइलका पुर्जा उत्पादन हुने केन्द्रमा क्षति पुगेको छ ।
इजरायलले शुक्रबार आकस्मिक रूपमा शुरू गरेको यो सैन्य कारबाही निरन्तर जारी छ ।
वाशिङ्टनस्थित एक मानवअधिकारवादी संस्थाले दिएको जानकारीअनुसार, अहिलेसम्म ५८५ जनाको मृत्यु भइसकेको छ, जसमा २३९ जना सर्वसाधारण रहेका छन् । घाइते हुनेको संख्या १,३०० नाघिसकेको छ ।
तेहरानमा त्रासदीको माहोल
राजधानी तेहरानभर पसलहरू बन्द छन् । प्रसिद्ध ग्रान्ड बजारसमेत सुनसान देखिएको छ । मानिसहरू ग्यासको लाइनमा उभिएका छन् भने थुप्रै राजधानी छाड्न प्रमुख नाकाहरूमा लाम लागेका छन् ।
इरानले इजरायलमाथि करिब ४०० मिसाइल र सयौं ड्रोन आक्रमण गरिसकेको छ । ती आक्रमणमा कम्तीमा २४ जना इजरायलीको मृत्यु भएको छ भने सयौं घाइते छन् ।
केन्द्रीय इजरायलमा केही मिसाइल अपार्टमेन्ट भवनमा खसेका छन्, जसले व्यापक क्षति पुर्याएको छ । बारम्बार साइरन बज्दा मानिसहरू सुरक्षित स्थानमा भागिरहेका छन् ।
बुधबार केही सीमित मिसाइल प्रहार भए पनि इजरायली पक्षले इरानी प्रक्षेपक उपकरणहरूलाई लक्षित गर्दै आक्रमणलाई जारी राखेको छ ।
इजरायली रक्षामन्त्री इजरायल काट्जले सामाजिक सञ्जालमार्फत लेखेका छन्, 'तेहरानमाथि आँधी चलेको छ । यस्तैगरी तानाशाहीहरू ढल्छन् ।'
इजरायली सरकारले भनेको छ, 'इरानलाई आणविक हतियार बनाउनबाट रोक्नु नै मुख्य उद्देश्य हो ।'
दुई महिनादेखि चलिरहेको अमेरिका–इरान वार्ता निष्कर्षमा नपुगेपछि इजरायली आक्रमण शुरू भएको बताइएको छ ।
इरानले भने आफ्नो आणविक कार्यक्रम शान्तिपूर्ण रहेको दाबी गर्दै आएको छ । तर, हाल उसले युरेनियमलाई ६० प्रतिशतसम्म प्रशोधन गरिरहेको छ, जुन हतियार-स्तरको ९० प्रतिशतबाट निकै नजिकको प्रविधि हो ।
अमेरिकी राष्ट्रपति ट्रम्पको चेतावनी
अमेरिकी राष्ट्रपति डोनाल्ड ट्रम्पले सामाजिक सञ्जालमार्फत इरानलाई 'शर्तविहीन आत्मसमर्पण' गर्न चेतावनी दिएका छन् ।
उनले इरानी सर्वोच्च नेता आयातोल्लाह अली खमेनी कहाँ लुकेका छन् भन्ने जानकारी अमेरिकासँग रहेको दाबी गरेका छन् । यद्यपि, अहिलेका लागि उनलाई लक्षित गर्ने योजना नरहेको ट्रम्पको प्रस्टोक्ति छ ।
ट्रम्प र इजरायली प्रधानमन्त्री बेन्जामिन नेतान्याहूबीच टेलिफोन संवाद भएको सञ्चार माध्यमहरूले जनाएका छन् । उता, इरानी सैन्य अधिकारीहरूले थप आक्रमणको चेतावनी दिँदै इजरायललाई सजाय दिने अभियान चाँडै शुरू हुने बताएका छन् ।
बुधबार बिहान ५ बजेतिर तेहरानमा शक्तिशाली विस्फोटका आवाजहरू सुनिएका छन् ।
ती विस्फोटहरू हकीमियेह क्षेत्रमा केन्द्रित देखिएका छन्, जहाँ इरानी ‘रिभोल्युशनरी गार्ड’ को एकेडेमी रहेको छ । अधिकारीहरूले यी आक्रमणबारे कुनै औपचारिक प्रतिक्रिया दिएका छैनन् ।
द्वन्द्व शुरू भएयता बन्द रहेको इजरायलको अन्तर्राष्ट्रिय विमानस्थल बुधबार बिहानदेखि पुनः सञ्चालनमा आएको छ । साइप्रसको लारनाका शहरबाट आएका दुईवटा विमान तेलअवीवको बेन गुरियन अन्तर्राष्ट्रिय विमानस्थलमा अवतरण गरेका छन् ।
विमानस्थलका प्रवक्ता लिसा डभिरका अनुसार, इजरायलले ब्यालेस्टिक मिसाइल आक्रमणको जोखिमका कारण व्यावसायिक उडानहरू स्थगित गरेको थियो, जसका कारण हजारौं इजरायली नागरिक विदेशमै अड्किएका थिए । हाल युद्धका कारण सम्पूर्ण क्षेत्रको हवाई यातायात प्रभावित भएको छ ।
– एपीको सहयोगमा
