२९ जेठ २०८३, शुक्रबार
पश्चिम नेपालका केही ठाउँमा रातिदेखि नै ठूलो पानी परेको छ । बाँके, बर्दिया, सुर्खेत, दैलेख, जाजरकोट, दाङ, रोल्पा, बागलुङ, पाल्पा, म्याग्दी, नवलपरासी, कास्की, लमजुङलगायत ठाउँमा ठूलो पानी परेको मौसम पूर्वानुमान महाशाखाले जनाएको छ ।
बाँके, गोरखा, लमजुङ्ग, कास्की, पर्वत, पाल्पा, बागलुङ लगायत आसपासको क्षेत्रमा मध्यमदेखि ठूलो पानी परेको छ ।
ठूलो पानी परेसँगै ती आसपासका क्षेत्रमा रहेका नदी तथा खोलामा बाढी आएकाले सतर्कता अपनाउन महाशाखाले भनेको छ ।
महाशाखाका अनुसार देशका केही भूभागका आज वर्षाको सम्भावना छ । केही स्थानमा भारी वर्षाको पनि सम्भावना रहेको महाशाखाले जनाएको छ ।
आज दिउँसो पनि कोशी, मधेश, बागमती र गण्डकी प्रदेशका एक/दुई ठाउँमा ठूलो पानी पर्न सक्ने तथा कोशी र मधेशका तराईका भू–भागका थोरै ठाउँमा हावाहुरीको समेत सम्भावना रहेको छ ।
कोशी, वाग्मती र गण्डकीका एक/दुई स्थानमा भारी वर्षाको सम्भावना छ ।
हाल कोशी, मधेश, वाग्मती, गण्डकी प्रदेशका केही भू–भाग र लुम्बिनीका पूर्वी क्षेत्रका थोरै भूभागमा मनसुनी वायुको प्रभाव छ ।
साथै देशको पश्चिम भूभागमा पश्चिमी वायु तथा स्थानीय वायुको आंशिक प्रभाव रहेको छ । भारतको पश्चिम बङ्गाल आसपासको क्षेत्रमा बनेको न्यूनचापीय क्षेत्रको समेत आंशिक प्रभाव रहेको छ।
