१७ असार २०८३, बुधबार
विनियोजन विधेयक (बजेट)माथि छलफल गर्न शनिबार प्रतिनिधिसभाको बैठक बसिरहेको छ ।
विनियोजन विधेयकअन्तर्गत विभिन्न मन्त्रालयमाथिको छलफलका लागि शनिबार पनि संसद्को बैठक राखिएको हो ।
शनिबार संघीय मामिला तथा सामान्य प्रशासन, गृह, परराष्ट्र, श्रम तथा रोजगार, सञ्चार तथा सूचना प्रविधि मन्त्रालयलगायतको विनियोजित शीर्षकमाथि छलफलको कार्यसूची छ । छलफल अघि ती मन्त्रालयमा विनियोजित शीर्षकमाथि खर्च कटौती प्रस्ताव पेस गर्ने कार्यसूची छ ।
विभिन्न सांसदले खर्च कटौती प्रस्ताव राखेकाले शनिबार संसद्को कार्यसूचीमा १६ बुँदा समावेश गरिएको छ ।
जेठ १५ देखि मसान्तसम्म संसद बैठक अवरुद्ध भएकोले एकै दिन आधा दर्जन मन्त्रालयमाथिको छलफल राखिएको हो ।
असार १२ गते भित्र विनियोजन लगायत बजेटका पूरक विधेयक समेत पारित गर्नेगरी संसद्को क्यालेन्डर तयार गरिएको छ ।
साउन १ गतेदेखि कार्यान्वयनमा आउने नयाँ बजेट असार मसान्त अगावै संसद्बाट पारित गरेर राष्ट्रपतिले प्रमाणित गर्नुपर्ने संवैधानिक बाध्यता छ ।
