२३ जेठ २०८३, शनिबार
प्रतिनिधिसभाका स्वतन्त्र सांसद डा. अमरेशकुमार सिंहले नेपालका ७२ जिल्ला अमेरिका, चीन या भारतलाई लीजमा (भाडामा) दिन सकिने अभिव्यक्ति दिएपछि संसद्मा हंगामा भएको छ ।
विनियोजन विधेयकमाथि आइतबार प्रतिनिधिसभामा भएको छलफलका क्रममा अमरेशले ५ वटा जिल्लामा मात्र बजेट गएको भन्दै बाँकी जिल्ला लीजमा दिन प्रस्ताव गरेका थिए ।
त्यसलगत्तै एमालेका मुख्य सचेतक महेश बर्तौलाले नियमापत्ति गर्दै राष्ट्रघाती अभिव्यक्ति दिने सांसदलाई कारबाही गर्नुपर्ने बताए ।
‘देशको नाम तोकेर जिल्ला लीजमा दिने कुरा आपत्तिजनक विषय हो । देशलाई कहीँकतै गाभिदिने भनेर संसद्को रोष्टमबाट अभिव्यक्ति दिनु राष्ट्रघाती र देशद्रोही विषय हो’ बर्तौलाले भने, ‘मुलुकको स्वाभिमानको विरुद्धमा अभिव्यक्ति दिने कुरा कारबाहीको विषय हो । उहाँको अभिव्यक्ति राष्ट्रघाती छ, यस्तो कुरा सुनेर बस्न सक्दैनौं ।’
बर्तौलाको आपत्ति लगत्तै सभमुख देवराज घिमिरेले अमरेशले बोलेको कुरा संसद्को रेकर्डबाट हटाउन निर्देशन दिए । आफ्नो अभिव्यक्ति रेकर्डबाट हटाएकोमा अमरेशले सभामुख घिमिरेसँग सवाल-जवाफ गरे ।
सभामुख एमालेको इसारामा चलेको आरोप लगाएपछि घिमिरेले नियमावली बाहिर गएर बोल्ने भए ड्यास छाड्न चेतावनी दिए । त्यसपछि अमरेशले आफूले पाएको ७ मिनेट रोष्टममै उभिएर बस्ने बताए ।
उनले आफ्नो निर्वाचन क्षेत्रलाई अपमान गरेकोले जिल्ला लीजमा दिन प्रस्ताव गरेको तर, राष्ट्रियताप्रति आफ्नो अटुट विश्वास रहेको बताए ।
