०४ साउन २०८३, सोमबार
राष्ट्रिय प्रजातन्त्र पार्टी (राप्रपा)ले भिजिट भिसा प्रकरणको छानबिनका लागि सरकारले बनाएको समितिप्रति आपत्ति जनाएको छ ।
मंगलबार बसेको प्रतिनिधि सभा बैठकमा बोल्दै राप्रपाका प्रमुख सचेतक ज्ञानबहादुर शाहीले छानबिन समितिप्रति आपत्ति जनाएका हुन् ।
उनले १८ वर्षमा १४ जना गृहमन्त्री भएको बताउँदै सबैलाई अनुसन्धानको घेरामा ल्याउनुपर्नेमा दूधको साक्षी बिरालो भनेजस्तो समिति बनाइएको बताए ।
बिरालोलाई दूधको साक्षी राखेर समस्याको समाधान हुन नसक्ने उनले जिकिर गरे । जसको विरूद्धमा छानबिन हुनुपर्ने हो उनीहरूले नै कर्मचारीलाई राखेर छानबिन समितिले विधिको शासन स्थापना नगर्ने उनको भनाइ छ ।
सरकारले बनाएको छानबिन समिति अपराधको ढाकछोप गर्ने र भिजिट भिसा प्रकरणमा संलग्न भएका १४ जना गृहमन्त्रीहरूलाई उन्मुक्ति दिन ल्याइएको नयाँ प्रोपोगाण्डा भएको उनले जिकिर गरे । सरकारको यो प्रोपोगाण्डाविरूद्ध राप्रपा सडक र सदनमा एकजुट हुने उनले बताए ।
