१२ साउन २०८३, मंगलबार
घरेलु टोली इङ्ल्यान्डले पहिलो टेस्ट क्रिकेटमा भारतलाई पाँच विकेटले हरायो । पहिलो टेस्टको पाँचौँ तथा अन्तिम दिन इङ्ल्यान्डले आफ्नो दोस्रो पालीमा पाँच विकेट गुमाएर तीन सय ७३ रन बनाउँदै विजय लक्ष्य पार गरेको हो ।
इङ्ल्यान्डले जितका लागि तीन सय ७१ रनको लक्ष्य पाएको थियो । भारतले पहिलो पालीमा चार सय ७१ रन बनाएको थियो । इङ्ल्यान्डले पहिलो पालीमा चार सय ६५ रन जोडेको थियो । भारतीय टोली दोस्रो पालीमा तीन सय ६४ रनमा अलआउट भएको थियो ।
भारतले इङ्ल्यान्डसँग पाँचवटा टेस्टको शृंखला खेल्ने कार्यक्रम छ । यो शृंखला आईसीसी विश्व टेस्ट च्याम्पियनसिपको नयाँ सत्रको अंग हो । इङ्ल्यान्ड र भारतबीचको दोस्रो टेस्ट जुलाई २ तारिखमा बर्मिङ्घममा शुरू हुनेछ । पहिलो टेस्टमा केही कीर्तिमान पनि बनेका छन् ।
यी हुन् पहिलो टेस्टमा बनेका केही कीर्तिमान
३७१ :लिड्सस्थित हेडिङ्ली क्रिकेट मैदानमा इङ्ल्यान्डले तीन सय ७१ रनको लक्ष्य पूरा गर्यो । टेस्ट क्रिकेटको इतिहासमा चौथो पाली खेल्दै इङ्ल्यान्डले पूरा गरेको यो दोस्रो ठुलो लक्ष्य हो । टेस्ट क्रिकेटको इतिहासमा भारतविरुद्ध कुनै पनि टोलीले पूरा गरेको यो दोस्रो ठुलो विजयलक्ष्य पनि हो । यसअघि सन् २०२२ मा एजबास्टनमा सन् २०२२ मा खेलिएको टेस्टमा भारतले दिएको तीन सय ७८ रनको लक्ष्य इङ्ल्यान्डले पूरा गरेको थियो ।
३५० : भारतविरुद्धको पहिलो टेस्टको अन्तिम दिन जितका लागि इङ्ल्यान्डले तीन सय ५० रन बनाउनु आवश्यक थियो । टेस्ट क्रिकेटको इतिहासमा अन्तिम दिन कुनै पनि टोलीले पूरा गरेको यो दोस्रो ठुलो विजयलक्ष्य हो । यसअघि सन् १९४८ मा हेडिङ्लीमा खेलिएको इङ्ल्यान्ड विरुद्धको टेस्टको अन्तिम दिन अस्ट्रेलियाले ४०४ रनको विजयलक्ष्य पूरा गरेको थियो ।
१ :इङ्ल्यान्ड विरुद्धको पहिलो टेस्टमा भारतका पाँच ब्याट्सम्यानले शतक बनाए । पहिलो पालीमा यशस्वी जैसवाल, कप्तान शुभमन गिल र ऋषभ पन्तले शतक बनाएका थिए । दोस्रो पालीमा पनि ऋषभ पन्त र केएल राहुलले शतक बनाएका थिए । पाँच ब्याट्सम्यानले शतक बनाए पनि टेस्ट क्रिकेटमा हार भोग्ने भारत इतिहासकै पहिलो टोली बनेको छ । यसअघि सन् १९२८ मा मेलबर्नमा खेलिएको इङ्ल्यान्ड विरुद्धको टेस्टमा चारवटा शतक बनाएर पनि अस्ट्रेलिया पराजित भएको थियो ।
८३५ :हेडिङ्लीमा खेलिएको इङ्ल्यान्ड विरुद्धको पहिलो टेस्टमा भारतले दुवै पालीमा गरेर कूल आठ सय ३५ रन बनायो । टेस्ट क्रिकेटको इतिहासमा केवल चौथो पटक यस्तो स्थिति सृजना भएको हो कि कुनै पनि टोलीले आठ सय ३५ रन बनाउँदा पनि हारको सामना गर्नुपर्यो । यसअघि सन् २०१४ मा एडलेइडमा खेलिएको अस्ट्रेलिया विरुद्धको टेस्टमा दुबै पालीमा गरेर सात सय ५९ रन बनाउँदा पनि भारतीय टोली पराजित भएको थियो ।
३ :भारत र इङ्ल्यान्ड विरुद्धको पहिलो टेस्टको चारवटै पालीमा तीन सय ५० भन्दा बढी रन बन्यो । टेस्ट क्रिकेटको इतिहासमा यो केवल तेस्रो पटक भएको हो । यसअघि सन् १९२१ मा एडलेइडमा र सन् १९४८ मा हेडिङ्लीमा खेलिएको टेस्टमा चारवटै पालीमा तीन सय ५० भन्दा बढी रन बनेको थियो ।
१६७३ :हेडिङ्लीमा खेलिएको भारत र इङ्ल्यान्डबीचको टेस्टमा दुवै टोलीले मिलेर कूल एक हजार ६ सय ७३ रन बनाए । इङ्ल्यान्ड र भारतबीच खेलिएको टेस्टमा बनेको यो सबैभन्दा बढी रन हो । यसअघि सन् १९९० मा म्यानचेस्टरमा खेलिएको भारत र इङ्ल्यान्डबीचको टेस्टमा कुल एक हजार एक सय १४ रन बनेको थियो । त्यो टेस्ट बराबरीमा सकिएको थियो ।
५ :हेडिङलीमा खेलिएको टेस्टमा कुनै पनि टोलीले चौथो पालीमा तीन सयभन्दा बढी रनको लक्ष्य पूरा गरेको यो पाँचौँपटक हो । यो स्टेडियममा इङ्ल्यान्डले तीन सय ७१ भन्दा बढी रनको लक्ष्य पूरा गर्दै भारतलाई हराएको यो दोस्रो पटक हो ।
१४९ :चौथो पालीमा इङ्ल्यान्डका ब्याट्सम्यान बेन डकेटले एक सय ४९ रन बनाए । भारत विरुद्धको टेस्टमा चौथो पालीमा ब्याटिङ गर्दै इङ्ल्यान्डका कुनै पनि ब्याट्सम्यानले बनएको यो सबैभन्दा ठुलो स्कोर हो । यसअघि सन् २०२२ मा एजबास्टनमा खेलिएको भारत विरुद्धको टेस्टमा चौथो पालीमा इङ्ल्यान्डका लागि जो रुटले अविजित एक सय ४२ रन बनाएका थिए ।
बेन डकेटले बनाएको एक सय ४९ रन इङ्ल्यान्डका लागि कुनै पनि ओपनर ब्याट्सम्यानले चौथो पालीमा बनाएको दोस्रो ठुलो स्कोर पनि हो । यसअघि सन् १९९५ मा इङ्ल्यान्डका ओपनर ब्याट्सम्यान माइक एथर्टनले दक्षिण अफ्रिकाविरुद्ध चौथो पालीमा अविजित एक सय ८५ रन बनाएका थिए ।
१८८ :इङ्ल्यान्डका लागि दोस्रो पालीमा ज्याक क्रावली र बेन डकेटले ओपनिङ विकेटका लागि एक सय ८८ रनको साझेदारी गरे । टेस्ट क्रिकेटको इतिहासमा चौथो पालीमा आएर कुनै पनि ओपनर ब्याट्सम्यानको जोडीले गरेको यो पाँचौँ ठुलो साझेदारी हो ।
चौथो पालीमा इङ्ल्यान्डका ओपनर ब्याट्सम्यानले गरेको भने यो दोस्रो ठुलो साझेदारी हो । यसअघि सन् १९९१ मा अस्ट्रेलियाविरुद्ध इङ्ल्यान्डका ओपनर ब्याट्सम्यान माइक एथर्टन ग्राहम गुचले चौथो पालीमा दुई सय तीन रनको साझेदारी गरेका थिए ।
