२८ जेठ २०८३, बिहीबार
सशस्त्र प्रहरी बल (एपीएफ)का निरीक्षक स्व. दुर्गाबाबु पाठकको स्मृतिमा स्थापित ‘दुर्गाबाबु पाठक स्मृति संगीत पुरस्कार’ नेपाल एपीएफ ठाकोदेवी जोगेन्द्र भगत स्कूल शम्भुनाथ सप्तरीमा अध्ययनरत कक्षा ८ का छात्र प्रज्वल पौडेललाई प्रदान गरिएको छ ।
सशस्त्र प्रहरी परिवार महिला संघको २४औं वार्षिकोत्सवको अवसर पारेर मंगलबार सशस्त्र पहरी नायब उपरीक्षक एवं सहप्रवक्ता शैलेन्द्र थापाले पौडेललाई पुरस्कार प्रदान गरेका हुन् ।
प्रज्वल संगीत विधातर्फ वाद्यवादन र गायनमा उत्कृष्ट ठहरिएका छन् ।
यसअघिका वर्षहरूमा सो पुरस्कार नेपाल एपीएफ स्कूल कीर्तिपुरका छात्रहरू रायन घिमिरे, आशिष रोकाया, साइजित पाण्डे, अनिश थापा मगर र अर्जुन झालाई प्रदान गरिएको थियो ।
स्व. पाठकको स्मृतिमा सि.सं. ७ सशस्त्र प्रहरी निरीक्षक आधारभूत तालिमका सहकर्मी अधिकृतहरूद्वारा सामूहिक रूपमा २०७३ सालमा अक्षयकोष स्थापना गरिएको थियो । कोषमा जम्मा भएको रकमको ब्याजबाट हरेक वर्ष सशस्त्र प्रहरी परिवार महिला संघको वार्षिकोत्सवमा सो पुरस्कार नेपाल एपीएफ स्कूलमा अध्ययनरत संगीततर्फ प्रथम हुने छात्र तथा छात्रालाई प्रदान गरिँदै आएको छ ।
२०६४ सालमा खुल्ला प्रतिस्पर्धाबाट सशस्त्र प्रहरी निरीक्षकमा सेवा प्रवेश गरेका स्व. पाठकले ‘पक्षी र निन्द्रा लाग्दैन’ गरी दुई वटा एल्बम बजारमा ल्याएका थिए ।
गीत संगीतमा रुचि राख्ने पाठक २०६०/२०६१ सालमा चितवनमा सम्पन्न सिनर्जी राइजिङ स्टारको उत्कृष्ट १० भित्र पर्न सफल भएका थिए भने आठौँ कालिका म्युजिक अवार्डमा बेष्ट आर्टिस्टको उपाधिसमेत हात पारेका थिए ।
गीत लेख्ने, संगीत दिने र आफैं गाउनेसमेत क्षमता भएका स्व. पाठकको प्रतिभालाई अमर राख्नका लागि उक्त अक्षयकोष स्थापना गरिएको हो ।
कर्तव्य पालनाको सिलसिलामा २०७२ चैत २८ गते धादिङको मलेखुमा भएको सडक दुर्घटनामा उनको निधन भएको थियो ।
