२३ असार २०८३, मंगलबार
प्रधानमन्त्री केपी शर्मा ओलीले इलामको माई नगरपालिकामा निर्मित अस्पतालको उद्घाटन गरेका छन् ।
उनले शनिबार माई नगरपालिका– २ दानाबारीमा निर्मित १५ शय्याको ‘माई नगर अस्पताल’को उद्घाटन गरेका हुन् ।
आर्थिक वर्ष २०७७/०७८ देखि निर्माण शुरू भएको अस्पताल सङ्घीय सरकारको सहयोगमा रु १० करोड ७० लाख २४ हजार खर्च भएको नगर प्रमुख खम्बासिंह लिम्बूले बताए । साढे १० रोपनी क्षेत्रफलमा पार्किङसहितको दुई तलाको अस्पताल निर्माण गरिएको छ ।
नवनिर्मित अस्पताल भवनबाट शनिबारदेखि नै स्वास्थ्य सेवा शुरू भएको छ । २४ सै घण्टा सेवा प्रवाह गर्ने व्यवस्था मिलाइएको माई नगर स्वास्थ्य शाखा प्रमुख पुष्कर कट्टेलले बताए ।
अस्पतालबाट आकस्मिक, आधारभूत प्रयोगशाला, एक्स-रे, भिडियो एक्स-रे, ईसीजी, फार्मेसीलगायत सेवा सञ्चालन गरिएको उनले जानकारी दिए ।
अस्पतालमा स्वास्थ्य बीमा कार्यक्रमसमेत लागू गरिएको छ ।
नगरपालिकाबासीको आधारभूत स्वास्थ्य उपचार पालिकाभित्र उपलब्ध गराउने र जटिल प्रकारका बिरामीलाई अन्य सुविधासम्पन्न अस्पतालमा रेफर गरेर जानुपर्ने भएकाले स्वास्थ्य बिमा कार्यक्रम पनि लागू गरिएको नगर प्रमुख लिम्बूले बताए ।
