घुस प्रकरणमा विवादमा परेका संघीय मामिला तथा सामान्य प्रशासन मन्त्री राजकुमार गुप्ताले प्रधानमन्त्री केपी शर्मा ओलीसँग भेटवार्ता गरेका छन् ।

प्रधानमन्त्रीले बोलाएपछि मन्त्री गुप्ता सोमबार बिहान बालुवाटार गएका थिए ।

प्रधानमन्त्री ओलीसँग छलफल गरेर उनी बालुवाटारबाट बाहिरिएका छन् । बालुवाटारबाट फर्केपछि मन्त्रीले दुईवटै मोबाइल अफ गरेका छन् ।

गुप्ताले प्रयोग गर्ने ९८५१२ ... ५५१, ९८५५० ... ५५१ नम्बरका दुवै मोबाइल अफ छन् । घुस प्रकरणको अडियो सार्वजनिक भएलगत्तै प्रधानमन्त्री ओलीले ‘एक्सन’ लिने तयारी गरेका छन् ।

मन्त्री गुप्ता सोमबार मन्त्रालय गएका छैनन् । मन्त्रालयका एक अधिकारीले साढे १२ बजेसम्म मन्त्री मन्त्रालयमा नआएको लोकान्तरलाई जानकारी दिए ।

यसअघि मन्त्री गुप्ताले आफूलाई भेट्न आउने मान्छेले नै मन्त्री क्वार्टरमा पैसा छाडेर गएको प्रधानमन्त्रीलाई फोनमा बताएका थिए ।

गुप्ता कास्की मालपोत कार्यालयका प्रमुख र भूमि आयोगका अध्यक्ष नियुक्तिका लागि चलखेल गरेर घुस लिएकोसम्बन्धी अडियो बाहिर आएपछि विवादमा तानिएका थिए ।

अडियो काण्डमा प्रधानमन्त्रीसँग मन्त्री गुप्ताको स्वीकारोक्ति– पैसाको पोको क्वार्टरमै छाडेर गएछन् !