२९ जेठ २०८३, शुक्रबार
भारतका विदेश मन्त्री एस. जयशंकरले भारत–चीन द्विपक्षीय सम्बन्धमा हालै भएका विकासबारे चीनका राष्ट्रपति शी जिनपिङलाई जानकारी गराएको बताएका छन् ।
शंघाई सहयोग संगठन (एससीओ) सदस्य राष्ट्रका विदेशमन्त्रीहरूसँगै मंगलबार एस. जयशंकरले चिनियाँ राष्ट्रपति शी जिनपिङसँग भेट गरेका हुन् ।
भेटपछि समाजिक सञ्जाल एक्समा उनले लेखेका छन्, 'आज बिहान बेइजिङमा राष्ट्रपति शी जिनपिङलाई एससीओका अन्य विदेशमन्त्रीहरूका साथ भेट गरेँ । भारतकी राष्ट्रपति द्रौपदी मुर्मु र प्रधानमन्त्री नरेन्द्र मोदीको तर्फबाट शुभकामना सन्देश पनि हस्तान्तरण गरें ।'
एस. जयशंकरले दुई देशबीचको पछिल्लो द्विपक्षीय सम्बन्धको अवस्थाबारे शी जिनपिङलाई जानकारी गराएको र उनीहरूको मार्गदर्शनलाई महत्वपूर्ण मानेको बताएका छन् ।
जयशंकर सोमबार दुईदिने भ्रमणका लागि चीन पुगेका थिए । सन् २०२० को जुनमा गलवान उपत्यकामा भएको भारत–चीनबीचको सैन्य झडपपछि उनको यो पहिलो चीन भ्रमण हो ।
सो झडपपछि दुई देशबीचको सम्बन्धमा चिसोपन देखिएको थियो । जयशंकर एससीओको विदेशमन्त्रीस्तरीय बैठकमा सहभागी हुन बेइजिङ पुगेका हुन् ।
