०१ असार २०८३, सोमबार
बचतकर्ताको झण्डै १७ करोड रकम अपचलन गरेर फरार भएका रुपन्देहीको तिलोत्तमास्थित डिंगरनगर दुरगामी बहुउद्देश्यीय सहकारीका सञ्चालकविरुद्ध पक्राउ पुर्जी जारी भएको छ ।
संस्थाका अध्यक्ष घनश्याम तिवारी र सचिव रामबहादुर थापालगायत सञ्चालकविरुद्ध पक्राउ पुर्जी जारी भएको हो ।
सहकारीका व्यवस्थापक बसन्त पराजुलीलाई पक्राउ गरिसकिएको इलाका प्रहरी कार्यालय, बुटवलका प्रमुख डीएसपी इन्द्रबहादुर रानाले जानकारी दिए ।
बचतकर्ताको करोडौं रकम दुरुपयोग गरेको घटनापछि सहकारी अहिले बन्द छ । झण्डै तीन सय बचतकर्ताले प्रदेश सहकारी दर्ता अधिकारीको कार्यालय र इलाका प्रहरी कार्यालय, बुटवलमा सञ्चालकविरुद्ध निवेदन दिएका छन् ।
अध्यक्ष तिवारी, सचिव थापालगायत अधिकांश पदाधिकारी सञ्चालक समिति सदस्य कांग्रेसका स्थानीय नेता कार्यकर्ता रहेको पाइएको छ ।
ठूला भनिएका मात्र होइन, चल्तीका स्थानीय सहकारीसमेत संकटमा फस्न थालेपछि रुपन्देहीका आम बचतकर्ता निकै समस्यामा परेका छन् । स्थानीय सञ्चालक रहेको जिल्लाको ३२ वर्ष पुरानो डिंगरनगर दूरगामी बहुउद्देश्यीय सहकारीका पदाधिकारीले बदमासी गरेपछि आफ्नै छरछिमेकी सञ्चालक रहेको वित्तीय संस्थाप्रति पनि सर्वसाधारणको विश्वास गुमेको छ ।
दूध र दुग्धजन्य पदार्थको कारोबारसमेत गर्दै आएको ३८ करोड पूँजी रहेको सहकारीको १ हजार ९०० बचतकर्ताका रहेका छन् ।
