२४ जेठ २०८३, आइतबार
पाकिस्तानको पञ्जाब प्रान्तमा भीषण मनसुन वर्षाले व्यापक जनधनको क्षति पुर्याइरहेको छ । पछिल्लो ४८ घण्टामा मात्रै ७० जनाले ज्यान गुमाएका छन् भने असार महिनाको अन्त्यदेखि हालसम्म मृत्यु हुनेको संख्या १२३ पुगेको छ ।
एक्सप्रेस न्यूजका अनुसार यो जानकारी प्रान्तीय विपद् व्यवस्थापन प्राधिकरणले दिएको हो ।
प्राधिकरणका अनुसार भारी वर्षाका कारण घरको छाना भत्किनु, भूक्षय र आकस्मिक बाढीका कारण ठूलो क्षति पुगेको छ । २५ जुनदेखि शुरू भएको वर्षायाममा हालसम्म ४६२ जना घाइते भएका छन् ।
शुक्रबार सबैभन्दा धेरै मृत्यु भएको रिपोर्ट गरिएको छ । लाहोर, चिनिओट, ओकारा, चकवाल र सरगोधामा १० जनाको मृत्यु भएको बताइएको छ ।
चिनिओट र लाहोरमा तीन–तीन जनाको ज्यान गएको छ, ओकारामा दुई र चकवाल तथा सरगोधामा एक–एक जनाको मृत्यु भएको हो ।
चकवाल जिल्ला सबैभन्दा धेरै प्रभावित भएको छ । त्यहाँको भीषण वर्षाले स्थानीय खोलामा बाढी आएको छ र भूस्खलनका कारण घर भत्किएका छन् । स्थानीय बासिन्दा विस्थापित भएका छन् ।
प्राधिकरणका महानिर्देशक इर्फान अलि कठियाले पोठोहार क्षेत्रमा मात्रै एक हजारभन्दा बढी मानिसको उद्धार गरिएको जानकारी दिएका छन् । तीमध्ये ४५० जना रावलपिण्डी, ३९८ जना झेलम र २०९ जना चकवालका हुन् ।
जियो टिभिका अनुसार पाकिस्तानमा असार महिनाको अन्त्यतिरदेखि शुरू भएको अविरल वर्षाका कारण हालसम्म २०० भन्दा बढीको मृत्यु भएको छ । तीमध्ये करिब १०० बालबालिका रहेका छन् ।
जियो टिभीका अनुसार सबैभन्दा धेरै पञ्जाब प्रान्तमा १२३ जनाको ज्यान गएको छ । त्यसपछि खैबर पख्तुनख्वामा ४०, सिन्धमा २१, बलुचिस्तानमा १६, इस्लामाबादमा १ र पाकिस्तानअधिकृत जम्मु–काश्मिरमा १ जनाको मृत्यु भएको हो ।
मृत्यु हुनेको कारण फरक–फरक भए पनि कम्तीमा ११८ जनाको मृत्यु घर भत्किएर भएको जनाइएको छ । त्यसैगरी ३० जना बाढीले बगाएर मारिएका छन् भने बाँकीहरूको ज्यान डुबेर, चट्याङ लागेर, करेन्ट लागेर र भूक्षयका कारण गएको हो ।
