१६ असार २०८३, मंगलबार
गृह मन्त्रालयको कर्मचारी हुँ भन्दै झुटो परिचय दिई जागिर लगाइदिने लोभ देखाएर ठगी गर्ने एक व्यक्तिलाई प्रहरीले पक्राउ गरेको छ।
पक्राउ पर्ने व्यक्ति सिन्धुलीको कमलामाई नगरपालिका-१३ स्थायी घर भई हाल काठमाडौं महानगरपालिका-३१ नयाँ बानेश्वर बसोबास गर्दै आएका ४६ वर्षीय गंगा हरि न्यौपाने छन् ।
उनलाई काठमाडौं उपत्यका अपराध अनुसन्धान कार्यालयको समन्वयमा जिल्ला प्रहरी कार्यालय सिन्धुलीको टोलीले भिमान चोकबाट पक्राउ गरेको हो ।
न्यौपानेले आफू गृह मन्त्रालयको कर्मचारी भएको बताई विभिन्न व्यक्तिहरूबाट नागरिकताको प्रतिलिपिसहित अन्य कागजात संकलन गरी जागिर लगाइदिने भन्दै ठगी गरेको उजुरी परेपछि अनुसन्धान शुरू गरिएको थियो ।
पक्राउ परेका न्यौपानेविरुद्ध विगतमा पनि विभिन्न ठगी, कीर्ते र आपराधिक कार्यमा संलग्न भएको विवरण सार्वजनिक भएका छन् । प्रहरीले दिएको जानकारीअनुसार, उनले २०६९ सालमा सैनिक अनुसन्धान सम्बन्धी नक्कली पत्र पेस गरी कैदी छुटाएका थिए भने २०७४ सालमा शान्ति सेनामा पठाइदिन्छु भनी चार लाख रूपैयाँ ठगी गरेको जाहेरी परेको छ ।
यस्तै, २०७४ सालमै उनले नख्खु कारागारबाट कैदी छुटाइदिने भन्दै १२ लाख रूपैयाँ ठगी गरेका थिए । २०७५ मा उनले लालपुर्जासहित जग्गा बिक्री गरिदिन्छु भन्दै रकम ठगी गरेका थिए भने नेपाली सेनाको सहायक सेनानी बनाइदिन्छु भन्दै विभिन्न व्यक्तिलाई प्रलोभनमा पारेको उजुरी पनि परेको छ ।
२०७९ सालमा भने उनले काठमाडौं जिल्ला अदालतको नक्कली फैसला बनाई लिखतसम्बन्धी कसुर गरेको प्रहरी प्रतिवेदनमा उल्लेख छ ।
पक्राउ परेका न्यौपानेलाई थप अनुसन्धान र कारबाहीका लागि जिल्ला प्रहरी परिसर, भद्रकाली पठाइएको काठमाडौं उपत्यका अपराध अनुसन्धान कार्यालयका एसपी काजी कुमार आचार्यले जानकारी दिए ।
