भारतको जम्मु–कश्मीरस्थित पाहलगाममा अप्रिल २२ मा भएको आक्रमणमा संलग्न तीन पाकिस्तानी आतंकवादी मारिएको भारतीय गृहमन्त्री अमित शाहले जनाएका छन् ।

मंगलबार लोकसभामा बोल्दै उनले सुलेमान उर्फ असिफ जट्ट, अफगान र जिब्रान नाम गरेका तीन पाकिस्तानी नागरिक ‘अपरेसन महादेव’ अन्तर्गत सुरक्षा बलद्वारा मारिएको जानकारी दिएका हुन् । 

कश्मीरमा एक नेपालीसहित २६ जनाको गोली हानी हत्या भएको तीन महिनाभन्दा बढी समयपछि सोमबार सैन्य कारबाहीमा हतियारधारी ती मानिस मारिएको उनले जानकारी दिएका हुन् । सोमबारको कारबाहीको नाम ‘अपरेसन महादेव’ रहेको छ । 

गृहमन्त्री शाहले मारिएका तीनमध्ये दुई जना पाकिस्तानमा रहेको संयुक्त राष्ट्र संघद्वारा घोषित आतंकवादी समूह लस्कर–ए–तैयबाका सदस्य रहेका बताए । 

प्रत्यक्षदर्शीको बयान, गोलीको मिलान र पाकिस्तानी मतदाता परिचयपत्रलगायत प्रमाणका आधारमा उनीहरूको पहिचान पुष्टि भएको पनि शाहले उल्लेख गरे ।

यसैगरी, उक्त आक्रमणको प्रतिकारस्वरूप सञ्चालन गरिएको अभियानलाई सफल बनाउने सुरक्षाकर्मीलाई भारतीय रक्षामन्त्री राजनाथ सिंहले राज्यसभाबाट बधाई दिएका छन् । उनले आक्रमणमा २६ जनाको मृत्यु भएपछि भारतले तत्काल र कडा प्रतिकार गर्ने नीति अनुरूप कारबाही गरेको बताए ।

प्रधानमन्त्री नरेन्द्र मोदीले पनि सुरक्षासम्बन्धी निर्णयमा सेना प्रमुखहरूको सल्लाह अनुसार काम भएको उल्लेख गरेका छन् । उनले ‘अपरेसन सिन्दूर’को सन्दर्भ उल्लेख गर्दै मे ९ मा करिब १ हजार पाकिस्तानी मिसाइल र ड्रोनहरू लक्षित गरिएको जानकारी गराएका थिए ।

उक्त अभियानको उद्देश्य स्पष्ट भए पनि विपक्षी दलहरूले समय छनोट र कार्यान्वयनको प्रक्रिया बारे प्रश्न उठाएका छन् । प्रधानमन्त्री मोदीले विपक्षीहरूलाई ‘राजनीतिक हिसाबले निराश’ भन्दै आलोचना खारेज गरेका छन् ।