कपिलवस्तुमा नुहाउन गएका दुई किशोरको खोलामा डुबेर मृत्यु भएको छ। बिहीबार साँझ कपिलवस्तु नगरपालिका-१० स्थित बिकुली खोलामा नुहाउने क्रममा उनीहरूको मृत्यु भएको हो । 

इलाका प्रहरी कार्यालय, पिपराका अनुसार मृत्यु हुनेमा बाणगंगा नगरपालिका-५, कोपवाका वापस चौधरी र निशान चौधरी रहेका छन्।
प्रहरी निरीक्षक लोकेन्द्र जिसीका अनुसार, पिरा र नगवा गाउँको बीचमा रहेको उक्त खोलामा बिहीबार साँझ उनीहरु नुहाउन गएका थिए। सोही क्रममा डुबेर उनीहरूको ज्यान गएको हो । 

घटनालगत्तै स्थानीय र प्रहरीको सहयोगमा दुवै जनाको शव निकालिएको थियो। मृतक दुवै किशोरको शव पोस्टमार्टमका लागि पिपरा अस्पताल पठाइएको प्रहरी निरीक्षक जिसीले बताए।