०५ साउन २०८३, मंगलबार
गएराति मधेश प्रदेशसहित देशका केही ठाउँमा हल्कादेखि मध्यम वर्षा भएको छ । रौतहट, सर्लाही, महोत्तरी, सिन्धुली, सिन्धुपाल्चोक, रामेछाप, कैलालीलगायत ठाउँमा राति मध्यम वर्षा भएको मौसम पूर्वानुमान महाशाखाले जनाएको छ ।
राति काठमाडौं उपत्यकामा पनि पानी परेको थियो । यद्यपि, बिहानदेखि काठमाडौंमा पानी पर्न राोकिएको छ ।
आज दिउँसो र राति पनि देशका धेरै ठाउँमा पानी पर्ने सम्भावना छ । आज दिउँसो गण्डकी र लुम्बिनीलगायत देशका पहाडी भू–भागका धेरै स्थान तथा तराईका केही ठाउँमा मेघगर्जन/चट्याङसहित मध्यम वर्षाको सम्भावना छ ।
कोशी, गण्डकी र लुम्बिनीका एक–दुई स्थानमा भारी वर्षाको पनि सम्भावना रहेको महाशाखाले जनाएको छ ।
आज राति कोशी, मधेश, बागमती, गण्डकीका धेरै स्थान तथा बाँकी प्रदेशका केही ठाउँमा मेघगर्जन/चट्याङसहित मध्यम वर्षाको सम्भावना छ । कोशीका एक–दुई स्थानमा राति भारी वर्षाको पनि सम्भावना रहेको महाशाखाले जनाएको छ ।
हाल देशभर मनसुनी वायुको प्रभाव छ । मनसुनको न्यून चापीय रेखा सरदर स्थानको थोरै उत्तरतर्फ अवस्थित रहेको मौसम पूर्वानुमान महाशाखाले जनाएको छ ।
