संवैधानिक इजलास गठन प्रधानन्यायाधीशले तोकेका न्यायाधीशबाट गर्ने कि गोलाप्रथाबाट गर्ने भन्ने विषयलाई लिएर न्यायाधीशहरू विभाजित भएको बेला सर्वोच्च बारले गोलाबाटै इजलास तोक्न लबिङ सुरु गरेको छ । 

सर्वोच्च बारले आइतबार प्रधानन्यायाधीश प्रकाशमान सिंह राउतलाई भेटगरी गोलाबाटै संवैधानिक इजलास गठनको निर्णय गर्न आग्रह गरेको हो । मेघराज पोखरेल सर्वोच्चको न्यायाधीश नियुक्त भएपछि नेतृत्वविहीन रहेको सर्वोच्च बार कार्यवाहक अध्यक्षको नेतृत्वमा प्रधानन्यायधीशलाई ज्ञापनपत्र बुझाउन गएको थियो । 

न्यायपरिषद्ले तोकेका न्यायाधीशहरूबिच गोलाप्रथा गरेर संवैधानिक इजलास गठनका लागि प्रधानन्यायाधीशको ध्यानाकर्षण गराइएको सर्वोच्च बारका सचिव रमन कर्णले लोकान्तरलाई जानकारी दिए ।

अधिवक्ता कर्णका अनुसार मुद्दा पेशीदेखि लिएर विभिन्न समसामयिक विषयवस्तुहरूमा र संवैधानिक इजलास गठनका विषयमा समेत ज्ञापन बुझाइएको हो ।

ज्ञापन पत्र बुझ्दै प्रधानन्यायाधीश राउतले यस विषयमा छलफल गरी टुङ्गोमा पुग्ने बारका पदाधिकारीहरूलाई बताएको कर्णले लोकान्तरलाई जानकारी दिए । कार्यवाहक अध्यक्ष अम्बर बहादुर राउतको नेतृत्वमा सर्वोच्च बारका पदाधिकारीहरूले प्रधान न्यायाधीशलाई ज्ञापन बुझाएको हो ।

संविधानको धारा १३७ मा प्रधानन्यायाधीशले संवैधानिक इजलासमा न्यायाधीश तोक्ने व्यवस्था गरिएको छ । संविधानको मर्मविपरित गोलाबाट संवैधानिक इजलास गठन गर्ने छलफल भएकोमा न्यायिकबृत्तबाट समेत विरोध भएको छ । 

शनिबार लोकान्तर डट्कमसँग कुरा गर्दै सर्वोच्चका पूर्वन्यायाधीश ईश्वरप्रसाद खतिवडाले  संविधानमा प्रस्ट लेखिएको विषयमा चलन चलाएर या नियम बनाएर बदल्न नमिल्ने बताएका थिए । 

सर्वोच्च बारको अतिरिक्त सक्रियतालाई सर्वोच्च अदालतका न्यायाधीशहरूले स्वाभाविक नलिएको स्रोतले बतायो । ‘यस्तो गम्भीर विषयमा सर्वोच्च बारको अतिरिक्त सक्रियता आश्चर्यको विषय छ, संविधानको मर्म विपरीत इजलास गठन गर भनेर बारले लबिङ गर्न मिल्छ ?’ सर्वोच्च स्रोतले लोकान्तरसँग भन्यो । 

सर्वोच्च बारले उक्त ज्ञापनपत्र प्रधानन्यायाधीशलाई बुझाइसकेपछि सर्वोच्च अदालतका न्यायाधीशहरुबीच आजै अनौपचारिक कुराकानी समेत चलेको थियो । सो क्रममा सर्वोच्च बारले किन यति धेरै अतिरिक्त चासो र  सक्रियता जनायो भनेर न्यायाधीशरुबीच अनौपचारिक छलफलका क्रममा गम्भीर छलफल भएको बताइएको छ । सो क्रममा सर्वोच्चका केही न्यायाधीशहरुले यसमा केही षड्यन्त्र समेत हुनसक्ने आशंका व्यक्त गरेको स्रोतको भनाइ छ । 

सर्वोच्चको फुलकोर्टमा संवैधानिक इजलास गठन गोलाप्रथाबाट गर्नेबारे न्यायाधीशहरूबिच विवाद भएको थियो । सो विवाद बल्झिदै जाँदा बिहीबार केही न्यायाधीशहरूबिच भनाभन भएको थियो । 

पढ्नुहोस् यो पनि 

‘गोलाप्रथाबाट संवैधानिक इजलास गठनको कुराले न्यायालयमा अव्यवस्था निम्त्याउँछ, संविधान प्रतिकूल हुन्छ’

गोलाप्रथाबारे सर्वोच्चमा विवाद चर्किँदै गर्दा के भन्छन् कानून व्यवसायी ?

सर्वोच्चको पूर्ण बैठकमा न्यायाधीशहरू विभाजित, संवैधानिक इजलास गठनबारेको एजेण्डा अलपत्र