०४ साउन २०८३, सोमबार
मोरङको बेलबारी नगरपालिकाले खरिद गरेको विद्युतीय नगर बस सञ्चालनमा आउन सकेको छैन । बस ल्याएको तीन महिनासम्म सञ्चालनमा आउन नसकेको हो । ३ महिनादेखि बसलाई खुला आकाशमै राखिएको छ । नयाँ ल्याएको बस थन्किएपछि स्थानीयले बसले घाम तापिरहेको भन्दै व्यंग्य गर्ने गरेका छन् ।
सञ्चालनमा आउनुपर्ने बस उल्टै भुक्तानी विवादमा फसेको छ । नगरपालिकाले अनावश्यक बखेडा झिकेर अन्तिम किस्ताको ३० लाख रुपैयाँ भुक्तानी रोकेको बस आपूर्तिकर्ता कम्पनीले आरोप लगाएको छ ।
आपूर्तिकर्ता कम्पनी नेशनल फायर सेफ प्रालिले बसको सम्पूर्ण भुक्तानी नपाएको गुनासो गरेको हो । प्रालिका संचालक खगेन्द्र कार्कीले सम्झौतामा नभएको चार्जिङ स्टेसनको विषय उठाएर नगरपालिकाले भुक्तानी रोकेको आरोप लगाए ।
नगरपालिकाले माग गरेको सबै चिज दिइसक्दा पनि भुक्तानी दिन ढिलाइ भएको उनको आरोप छ ।
नेशनल फायर सेफ प्रालिले भ्याटबाहेक १ करोड १६ लाख रुपैयाँमा १८ सिटे बस नगरपालिकालाई दिएको हो ।
कार्कीका अनुसार बस खरिद सम्झौतामा चार्जिङ स्टेसन निर्माण गर्ने केही उल्लेख थिएन । तर, अहिले चार्जिङ स्टेसनको कुरा उठाएर भुक्तानी रोकिएको छ ।
यता, प्रदेश सरकारले बेलबारीमा छुट्टै चार्जिङ स्टेसन निर्माण गरिसकेको छ । तर, ट्रान्सफर्मर अभावमा चार्जिङ स्टेसन सञ्चालनमा आउन भने सकेको छैन ।
बेलबारीका नगर प्रमुख दिलप्रसाद राईले पहिलो निर्णय नै नगर बस सञ्चालन गर्ने गरेका थिए । उनको कार्यकाल आधाभन्दा बढी समय बितेको छ । नगरपालिकाले नगरवासीलाई सहज र सुलभ यातायात सेवा दिने उद्देश्यले बस खरिद गरेको बस भने सञ्चालनमा ल्याउन सकेको छैन ।
नगर बस खरिद गर्दा प्रमुख प्रशासकीय अधिकृत किरण ढकाल थिए । उनी गत जेठ २५ गते अकास भए । त्यसपछि प्रमुख प्रशासकीय अधिकृत सञ्जयबहादुर राजलवट आए ।
आपूर्तिकताले यो विषयमा नगर प्रमुख दीलप्रसाद राईसँग पनि कुरा भएको तर, प्रमुखले प्रशासकीय अधिकृतसँग नै कुरा गर्न भनेर पन्छिने गरेको आरोप लगाएको छ ।
नगरपालिकाले भने विद्युतीय नगर बसको अन्तिम किस्ता भुक्तानी प्राविधिक स्पष्टतापछि मात्र गरिने बताएको छ । बसको स्पेसिफिकेसनमा ‘इ–बस विथ चार्जिङ स्टेसन’ भनेर उल्लेख भएपछि आपूर्तिकर्ताको जिम्मेवारीबारे अन्योल सिर्जना भएकाले भुक्तानी रोकिएको नगरपालिकाकी लेखा प्रमुख धनमाया राईले बताइन् ।
बस आपूर्तिकर्तालाई करिब ३० लाख रुपैयाँ भुक्तानी दिन बाँकी रहेको स्वीकार्दै लेखा प्रमुख राईले भनिन्, ‘बसको स्पेसिफिकेसनमा ‘इ–बस विथ चार्जिङ स्टेसन’ भनेर लेखिएकोले अन्योल सिर्जना भएको हो । यो प्राविधिक विषय भएकाले हामीले यसमा केही गर्न सक्दैनौं ।’
उनका अनुसार अघिल्ला प्रमुख प्रशासकीय अधिकृतको कार्यकालमा भुक्तानीको प्रक्रियाअघि बढे पनि अन्तिम समयमा नगरपालिकाको सर्भरमा समस्या आएकाले रोकिएको थियो । ‘पहिलो हाकिम हुँदाखेरि भुक्तानी गरिदिने भनेर प्रक्रिया अघि बढाइएको थियो, तर त्यही दिन सर्भर डाउन भएर गर्न पाइएन,’ उनले भनिन् ।
हालका प्रमुख प्रशासकीय अधिकृतले प्राविधिक विषयमा स्पष्ट नभई भुक्तानी प्रक्रिया अघि नबढाउन निर्देशन दिएको राईले जानकारी दिइन् । ‘नयाँ हाकिमले मेकानिकल इन्जिनियरलाई राखेर उहाँबाट क्लियर नभएसम्म भुक्तानी नगर्ने भन्नुभएको छ,’ उनले भनिन् ‘नबुझेको विषयमा हात नलाउनु भन्ने उहाँको निर्देशन छ ।’
लेखा प्रमुख राईका अनुसार, मेकानिकल इन्जिनियर आज वा भोलिसम्म आएर यसबारे स्पष्ट पारेपछि भुक्तानी प्रक्रिया अघि बढ्नेछ ।
