२२ जेठ २०८३, शुक्रबार
एभरेष्ट महिला भलिबल लिगमा सहभागी टोलीमध्येको एक मधेश युनाइटेडले आफ्नो नयाँ लोगो सार्वजनिक गरेको छ । नयाँ लोगोले खेल संस्कृति र मधेशको गर्वलाई एउटै प्रतिकमा समेटेको क्लबले जनाएको छ ।
नयाँ लोगो हरियो रङको रहेको छ । ‘खेलकुद र संस्कृतिको संयोजन रहेको नयाँ लोगोको केन्द्रमा भलिबल राखिएको छ । यसले टिमको खेल र प्रतिस्पर्धाको भाव दर्शाउँछ । यसको चारैतिरको लहर भनेको भलिबलको गतिशिलता, उर्जा र तिब्रताको प्रतिक हो’ क्लबद्वारा जारी विज्ञप्तिमा भनिएको छ ।
नयाँ लोगोको माथिल्लो भागमा जानकी मन्दिरको प्रतिक रहेको छ । यसले मधेश प्रदेशको सांस्कृतिक पहिचान र धार्मिक सम्पदालाई दर्शाउने क्लबले जनाएको छ । मन्दिरले मधेशको ऐतिहासिकता र संस्कृतिलाई समेटेको पनि क्लबले जनाएको छ ।
मधेश युनाइटेड टोलीको मार्की खेलाडी निरुता ठगुन्ना हुन् । अन्य खेलाडीमा आरती सुवेदी, कोपिला राणा, सरस्वती कटेल, उषा बिष्ट, वविता बोहरा र वसन्ती साउद रहेका छन् । टोलीको प्रशिक्षकमा कोपिला उप्रेती र ब्रान्ड एम्बेसडरमा नीति शाह रहेका छन् ।
