२३ जेठ २०८३, शनिबार
२२ वर्ष अघिदेखि सञ्चालित जुलिज केक्स एन्ड पेस्ट्रिजले आफ्नो नयाँ शाखा ललितपुरको इमाडोलमा सञ्चालनमा ल्याएको छ ।
सुरुमा श्रीमान्-श्रीमती र चार जना कामदारबाट शुरू भएको यो यात्रामा अहिले धेरैले रोजगारी पाएका छन् । जुली प्रधानाङ्गले शुरू गरेको यो घरेलु उद्योग व्यावसायिक रूपमा अगाडि बढिरहेको छ ।
जुली यसमा आफ्नो मेहनत, ग्राहकको माया र उत्पादनको गुणस्तरलाई सबैभन्दा महत्त्वपूर्ण मान्छिन् । उनी भन्छिन्, ‘ग्राहकको रोजाइअनुसार गुणस्तरीय उत्पादन दिन पाउँदा मलाई धेरै सन्तुष्टि मिल्छ ।’
बजारमा जताततै खुलेका बेकरी र केक पसलहरूको गुणस्तर, मूल्य र सरसफाइमा सरकारी निकायबाट अनुगमन र निगरानी भएमा उपभोक्ताले स्वस्थकर उत्पादन पाउन सक्ने उनको भनाइ छ ।
जुलीका अनुसार ठूला होटलका महँगा उत्पादन सबै वर्गका नेपालीको पहुँचमा हुँदैनन्, त्यसैले सबैका लागि सुलभ मूल्यमा उत्पादन दिनु आफ्नो ब्रान्डको विशेषता हो ।
जुलिज केक्स एन्ड पेस्ट्रिजको कुपण्डोलस्थित मुख्य आउटलेट राम्रैसँग चलेको छ । तर, काठमाडौं, भक्तपुर र ललितपुरबाट माग बढ्दै गएपछि खोलिएको लैनचौरको अर्को आउटलेट भने कोरोना महामारीका कारण बन्द गर्नुपरेको थियो ।
जुलीले आजबाट आफ्नो तेस्रो शाखा इमाडोलमा खोलेको बताइन् । ग्राहकको बढ्दो माग, बजारको विस्तार र फ्याक्ट्री नजिक भएकाले ताजा र छिटो सेवा दिन यो शाखा खोलिएको उनले बताइन् ।
होम डेलिभरीको सुविधा भए पनि धेरै ग्राहक अर्डर गर्न पसलमै आउने गर्छन्, जसबाट उनीहरूले प्रत्यक्ष रूपमा प्रतिक्रिया पाउँछन् र व्यवसायलाई थप व्यवस्थित गर्न मद्दत मिल्छ ।
जुली आफ्नो व्यवसायमा दक्ष जनशक्ति, नयाँ प्रविधि र पर्याप्त प्राविधिक ज्ञानका साथ अगाडि बढिरहेकी छन् । साथै, फुडमाण्डु, मुन्चा, ठमेल डटकम जस्ता प्लेटफर्महरूसँगको साझेदारीमा बिक्री वितरण गर्दै आएको छ ।
जुली प्रधानाङ्गले आफ्नो व्यवसायलाई इ–कमर्स क्षेत्रमा अघि बढाउने बताइन् ।
