१२ असार २०८३, शुक्रबार
काठमाडौंको कालो पुलस्थित भाडाको कोठाबाट हुण्डी र अभौतिक मुद्रा (क्रिप्टोकरन्सी) कारोबार गरेको आरोपमा ४ जना पक्राउ परेका छन् ।
बिहीबार दिउँसो करिब २:३० बजे गोप्य सूचनाका आधारमा खटिएको काठमाडौं जिल्ला प्रहरी परिसरको टोलीले उनीहरूलाई पक्राउ गरेको हो ।
पक्राउ पर्नेमा बारा महागढीमाईका २ नेपाली ओम प्रकाश जयसवाल (२७) र मनमोहन कुमार सिंह (२५), तथा भारत विहारका विक्रम जयसवाल (३३) र मुन्ना जयसवाल (३३) रहेका छन् ।
पक्राउ परेकाको साथबाट प्रहरीले नगद १५ लाख ३३ हजार रुपैयाँ र मोबाइल ५ थान बरामद गरेको छ ।
थप अनुसन्धानमा उनीहरूले ६ करोड ६ लाख ६३ हजार ६८७ रुपैयाँ बराबरको क्रिप्टो कारोबार गरेको खुलेको प्रहरीले जनाएको छ।
घटनाबारे थप अनुसन्धान भइरहेको प्रहरीको भनाइ छ ।
