०५ साउन २०८३, मंगलबार
पश्चिम नवलपरासीको परासीस्थित नेपाल नेत्रज्योति संघअन्तर्गत रहेको डा. विनोद निता कँडेल आँखा अस्पतालले एक वर्षमै ५३ हजारभन्दा बढीको आँखा जाँच गरेको छ । अस्पतालका अनुसार आर्थिक वर्ष २०८१/०८२ मा नियमित ओपीडी सेवा, विभिन्न उपकेन्द्र, विद्यार्थी आँखा जाँच कार्यक्रम र शिविरमार्फत् ५३ हजार २८ जनाको आँखाको परीक्षण गरिएको हो ।
अस्पतालका व्यवस्थापन अजय पाण्डेका अनुसार उपचार गरेकामध्ये १२ हजार ९४९ भारतीय नागरिकले ओपीडी सेवा लिएका हुन् । भारतका विभिन्न ठाउँबाट यहाँ आँखाको शल्यक्रिया गराउन यस अस्पताल आउने गरेका छन् ।
यस अस्पतालमा सेवा सुल्क सस्तो तथा कतिपय अवस्थामा नि:शुल्क पनि उपचार हुने भएकाले भारतीय नागरिकको लर्को लाग्ने गरेको पाण्डेले बताए । वि.स.२०४५ सालमा स्थापना भएको यो आँखा अस्पतालले गुणस्तर पक्षलाई ध्यान दिएको उनी दाबी गर्छन् । गत वर्ष पनि अस्पतालमा ३७ हजार ६ सय ३२ जना सेवाग्राहीले ओपीडीबाट सेवा लिएका थिए ।
यसबाहेक अस्पतालअन्तर्गत सञ्चालित चार वटा उपकेन्द्रहरू सुनवल, सरावल, प्रतापपुर र सुस्तामार्फत् २ हजार ६२९ जनाले सेवा लिएका छन् । यस्तै, विभिन्न स्थानमा सञ्चालित नि:शुल्क शिविरहरूबाट ५ हजार ५८८ जनाको आँखाको परीक्षण गरिनुका साथै १ हजार ४०० जनाको मोतियाबिन्दुको शल्यक्रिया गरिएको अस्पतालले जनाएको छ ।
विद्यालयकेन्द्रित विद्यार्थी आँखा जाँच कार्यक्रमअन्तर्गत ७ हजार ३४६ जना विद्यार्थीको आँखा परीक्षण गरिएको छ भने परीक्षणपछि ३७० जना विद्यार्थीलाई नि:शुल्क चस्मा वितरण गरिएको छ ।
अस्पतालमार्फत् १ हजार ४८९ जनाको मेजर शल्यक्रिया र ६७ जनाको माइनर शल्यक्रिया गरिएको अस्पतालले जानकारी दिएको हो ।
