सामसङले आफ्नो प्रमुख सीएसआर पहल सामसङ इनोभेसन क्याम्पस अन्तर्गत कोडिङ र प्रोग्रामिङ कोर्सको तेस्रो ब्याच पूरा गरेका त्रिभुवन विश्वविद्यालय अन्तर्गत पूर्वीय इन्जिनियरिङ क्याम्पसका ५६ विद्यार्थीलाई प्रमाणपत्र वितरण गरेको छ ।

बिहीबार आयोजित कार्यक्रममा त्रिभुवन विश्वविद्यालयका कुलपति प्राडा. दीपक अर्याल, पूर्वीय क्याम्पस प्रमुख डा. सञ्जय उप्रेती र इन्जिनियरिङ अध्ययन संस्थाका डीन प्राडा. सुशील बी. बज्राचार्यको उपस्थितिमा विद्यार्थीहरूलाई प्रमाणपत्र प्रदान गरिएको हो । अब नयाँ ब्याचको एआई र बिग डाटा तालिम शुरू हुने सामसङले जनाएको छ ।

सामसङ नेपाल कार्यालयका मानवश्रोत प्रबन्धक जयन्त मणि कायस्थले कोडिङ र प्रोग्रामिङको तेस्रो ब्याच पूरा भएकोमा खुशी व्यक्त गर्दै सामसङ इनोभेसन क्याम्पसले नेपाली युवालाई भविष्यमुखी सीपले सशक्त बनाउँदै आएको बताए । उनले त्रिभुवन विश्वविद्यालयसँगको सहकार्यमा एआई, बिग डाटा र आईओटीको तालिमलाई अझ सुदृढ बनाइने उल्लेख गरे ।

डिसेम्बर २०२२ मा शुरू भएको सामसङ इनोभेसन क्याम्पसले नेपाली युवालाई एआई, बिग डाटा र आईओटी र कोडिङ–प्रोग्रामिङमा तालिम दिँदै आएको छ। विद्यार्थी छनोट एल्गोरिदम, डाटा स्ट्रक्चर र प्रोग्रामिङ ज्ञानका आधारमा हुने गर्छ ।

इन्जिनियरिङ अध्ययन संस्थाका डीन प्राडा. सुशील बी बज्राचार्यले नेपालमा यो प्रतिष्ठित कार्यक्रम सञ्चालन गर्न सामसङसँग सहकार्य गर्न पाउनु गर्वको विषय भएको बताए । उनले कोडिङ र प्रोग्रामिङ कोर्सलाई पाएको प्रशंसा र विद्यार्थीहरूको लागि प्रविधि सिकाइ विस्तार गर्नुपर्ने आवश्यकता औंल्याए ।

कार्यक्रममार्फत विद्यार्थीहरूले प्राविधिक सीपसँगै रोजगारीयोग्यता, समस्या समाधान र सृजनात्मकता जस्ता सफ्ट स्किल्स पनि सिक्नेछन् । उनीहरूले एआई, बिग डाटा र आईओटी कोडिङ–प्रोग्रामिङ र आईओटी प्रयोग गरी सामाजिक महत्वका परियोजनामा काम गर्ने सुविधा पाउनेछन्, जसले वास्तविक चुनौतीहरूको समाधानमा योगदान पुर्‍याउनेछ ।

सामसङ इलेक्ट्रोनिक्स कम्पनी लिमिटेडले टेलिभिजन, स्मार्टफोन, वेयरेबल्स, ट्याब्लेट, गृह उपकरण, नेटवर्किङ, मेमोरी, सिस्टम एलएसआई, फाउन्ड्री, चिकित्सा इमेजिङ, एचभीएसी, रोबोटिक्स र अटोमोटिभ अडियो उत्पादनलगायत क्षेत्रमा नवीनतम् प्रविधिमार्फत नयाँ मानक स्थापित गर्दै आएको छ । 

कम्पनीले स्मार्ट थिङ्स इकोसिस्टम र एआईको एकीकरणमार्फत सहज र बुद्धिमानी जडान अनुभव प्रदान गर्दै आएको छ ।