०२ असार २०८३, मंगलबार
मोरङको सुकुना बहुमुखी क्याम्पसस्थित स्वतन्त्र विद्यार्थी युनियन (स्ववियु)को कार्यालयमा ताला लगाइएको छ । स्ववियु सभापति एलिस ओझाले आर्थिक दुरुपयोग गरेको भन्दै समितिका बहुमत सदस्यहरूले स्ववियुको कार्यालयमा ताला लगाएका हुन् ।
स्ववियु सचिव रोशन क्षेत्री, कोषाध्यक्ष सरिना थापा, सहायक सचिव होमबहादुर पौडेललगायत बहुमत सदस्यहरूले संयुक्त विज्ञप्ति जारी गर्दै सभापतिको कार्यशैलीप्रति कडा आपत्ति जनाएका छन् ।
सभापति ओझाले अनेरास्ववियुको २४औं महाधिवेशनका लागि भन्दै स्ववियु कोषबाट २० हजार रुपैयाँ रकम समितिको कुनै आधिकारिक बैठक, छलफल वा सामूहिक सहमतिविना नै निकालेको आरोप उनीहरूले लगाएका छन् । ‘स्ववियुको नक्कली लेटरप्याट प्रयोग गरेर ५ लाखसम्म दुरुपयोग गरेको पाएका छौं,' स्ववियुका एक सदस्यले भने, ‘हामीले छानबिनका लागि २४ घण्टाको समय दिएका छौं ।’
विद्यार्थीको हकहित र समस्या समाधानका लागि जम्मा गरिएको कोषलाई व्यक्तिगत स्वार्थमा प्रयोग गरिएको भन्दै उनीहरूले पाँच बुँदे माग अघि सार्दै सभापति र क्याम्पस प्रशासनलाई २४ घण्टे अल्टिमेटम दिएका छन् ।
उनीहरूले सभापतिलाई रकमको सम्पूर्ण विवरण तत्काल सार्वजनिक गर्न, एकल निर्णय गर्नुको स्पष्टीकरण दिन र भविष्यमा यस्ता गतिविधि नदोहोर्याउन चेतावनी दिएका छन् ।
त्यसैगरी, क्याम्पस प्रशासनलाई पनि स्ववियु अध्यक्षलाई कुन प्रयोजनका लागि रकम दिइएको हो त्यसको जवाफ २४ घण्टाभित्र लिखित रूपमा पेस गर्न उनीहरूले आग्रह गरेका छन् ।
बहुमत सदस्यहरूले यो विषयमा ढाकछोप नगरी छानबिन प्रक्रिया अगाडि नबढाए चरणबद्ध आन्दोलनमा जाने चेतावनी दिएका छन् ।
