०४ साउन २०८३, सोमबार
विश्व क्रिकेटकै महान खेलाडीमध्येका एक सर डोनाल्ड ब्राडम्यानले एसेस शृंखलाका क्रममा लगाएको क्याप (टोपी) दुई लाख ८६ हजार सात सय अमेरिकी डलर (करिब चार करोड नेपाली रुपैयाँ)मा बिक्री भएको छ ।
आफ्नो समयका प्रभावशाली अस्ट्रेलियन खेलाडी ब्राडम्यानले सन् १९४६–४७ मा परम्परागत एसेस शृंखला खेल्दा उक्त क्याप लगाएका थिए । उक्त क्याप अस्ट्रेलियाको नेशनल म्युजियमले खरिद गरेको समाचारमा जनाइएको छ ।
उक्त म्युजियम राजधानी क्यानबेरामा रहेको छ । उक्त क्यापको आधा रकम अस्ट्रेलियाको केन्द्र सरकारले चुक्ता गरेको बताइएको छ । सन् १९४६–४७ को एसेस शृंखलामा ब्राडम्यानले टोलीको कप्तानी गर्दा उक्त क्याप लगाएका थिए ।
उक्त एसेस शृंखला दोस्रो विश्व युद्धपछि अस्ट्रेलियाले इङ्ल्यान्डसँग खेलेको पहिलो शृंखला पनि थियो । अस्ट्रेलियन टोलीले पाँच टेस्टको उक्त शृंखला ३–० ले जितेको थियो ।
‘तपाईँ शायदै कुनै यस्तो अस्ट्रेलियन नागरिकलाई भेट्नु होला जसले सर डोनाल्ड ब्राडम्यानको नाम सुनेको छैन । त्यसैले यो क्याप खरिद गरेर हामी नयाँ पुस्तालाई इतिहासको महत्त्व बुझाउन चाहन्छौं,’ अस्ट्रेलियाका कला तथा संस्कृति मन्त्री टोनी बर्कले भनेका छन् ।
ब्राडम्यानको यो क्यापले अस्ट्रेलियामा दशकौंदेखि विकसित हुँदै आएको खेल र संस्कृतिबीचको आपसी सम्बन्धलाई पनि दर्साउने धारणा मन्त्री बर्कले व्यक्त गरे । यो क्याप ब्राडम्यानको ११ वटा ब्यागी ग्रिन्स क्यापमध्ये एक हो ।
उनले लगाएको एउटा क्याप अस्ट्रेलियाको स्पोर्ट्स म्युजियममा पनि राखिएको छ । बाँकी नौ वटा क्याप भने विभिन्न व्यक्तिले खरिद गरेका छन् ।
नेशनल म्युजियमकी निर्देशक क्याथरिन म्याकमहनले ब्राडम्यानको यो क्यापले अब म्युजियमको शोभा बढाउने बताइन् ।
