०५ साउन २०८३, मंगलबार
नेकपा (माओवादी केन्द्र)का संयोजक पुष्पकमल दाहाल 'प्रचण्ड'ले आन्दोलनरत नर्सहरूका माग तत्काल सम्बोधन गर्न सरकारसँग आग्रह गरेका छन् ।
बुधबार सामाजिक सञ्जालमार्फत उनले नर्सहरूको सम्मान, सुरक्षाको ग्यारेन्टी र पेसागत अधिकार सुनिश्चितता नभई जनस्वास्थ्य सेवा प्रणाली बलियो बन्न नसक्ने भन्दै उनीहरूका माग तत्काल सम्बोधन गर्न आग्रह गरेका हुन् ।
'नर्सहरूको सम्मान, सुरक्षाको ग्यारेन्टी र पेसागत अधिकार सुनिश्चितता नभई नेपालको जनस्वास्थ्य सेवा प्रणाली बलियो बन्न सक्दैन । त्यसैले हाम्रो पार्टी नर्सहरूका मागहरू तत्काल सम्बोधन गर्न सरकारसँग आग्रह गर्दछ,' उनले लेखेका छन् ।
उनले करिब डेढ लाख नर्सिङ सेवामा कार्यरत कर्मचारीहरूले तोकिएको तलबमान भन्दा कम पारिश्रमिकमा काम गर्नुपर्ने बाध्यता रहेको बताएका छन् ।
'यतिखेर देशभरका झन्डै डेढ लाख नर्सिङ सेवामा कार्यरत कर्मचारीहरू तोकिएको तलबमान भन्दा कम पारिश्रमिकमा काम गर्नुपर्ने बाध्यता, असमान व्यवहार, स्टाफको कमीले निम्त्याएको दबाब, अस्थायी रोजगारी, सामाजिक सुरक्षाको अभाव, कार्यस्थलमा असुरक्षा र तीव्र विदेश पलायनजस्ता समस्याविरुद्ध विभिन्न चरणमा आन्दोलनरत छन्,' उनले भनेका छन् ।
