काठमाडौं, १० पुस– नेकपा एमालेका बरिष्ठ नेता माधव कुमार नेपालले विश्वको कुनै पनि शक्तिले एमाले र माओवादीबीचको एकता नरोकिने दाबी गरेका छन् ।

संयुक्त वाम गठबन्धन काठमाडौ क्षेत्र नम्बर २ ले थलीमा आयोजना गरेको बधाई एवै धन्यवाद ज्ञापन कार्यक्रममा एमाले वरिष्ठ नेता नेपालले कसैको बहकाउ र भ्रममा नपर्न दुवै पार्टीका नेता कार्यकर्तालाई आग्रह गरे । 

‘दुनियाको कनुै पनि तागतले दुई पार्टीको एकता रोकिँदैन’ कार्यक्रममा नेता नेपालले भने,‘ तपाईंहरु कसैको बहकाउ र भ्रममा नपर्नुस् ।’

नेता नेपालले प्रतिनिधि सभा र समानुपातिकको परिणाम सार्जजनिक गर्न निर्वाचन आयोगले ढिलाई गरेको भन्दै आपत्ति जनाए । 

बरिष्ठ नेता नेपालले प्रत्यक्ष तर्फको निर्वाचन  परिणाम सार्वजनिक भएपछि प्रधानमन्त्री शेरबहादुर देउवाले राजिनामा दिएर नैतिकता देखाउनु पर्नेमा उल्टै राष्ट्रियसभाको बखेडा निकालेर अत्तो थाप्ने काम  गरिरहेको आरोप लगाए ।

संविधानमा उल्लेख नै नभएको एकल संक्रमणीय प्रणालीलाई स्वीकार गर्न नसकिने बताउंदै उनले राष्ट्रिय सभा बहुमतीय प्रणालीमा नै गठन हुने ठोकुवा गरे ।

कार्यक्रममा निर्वाचन मा विभिन्न ढंगवाट सहयोग गर्ने व्यक्तिहरुलाई धन्यवाद ज्ञापन गरिएको थियो ।