२४ जेठ २०८३, आइतबार
फ्रान्समा आयोजित डी–डेको ८२ औं वार्षिकोत्सव समारोहमा अमेरिकी रक्षा मन्त्री पिट हेगसेथले युरोपेली मुलुकहरूको आप्रवासन नीतिको आलोचना गरेका छन् ।
उनले युरोपका विभिन्न समुद्री तटमा आप्रवासीहरूको बढ्दो आगमनलाई ‘आक्रमण’को संज्ञा दिँदै त्यसलाई रोक्न युरोपेली देशहरूले प्रभावकारी कदम चाल्नुपर्ने बताएका हुन् ।
नर्मन्डीमा आयोजित कार्यक्रममा बोल्दै हेगसेथले स्पेन, इटाली, ग्रीस र बुल्गेरियाका समुद्री तटहरूमा डुंगामार्फत आप्रवासीहरू आइरहेको उल्लेख गर्दै युरोपेली राजधानीहरूले यस अवस्थाबारे कहिले गम्भीर कदम चाल्ने भनी प्रश्न गरेका छन् ।
सन् १९४४ मा नाजी जर्मनीको नियन्त्रणमा रहेको युरोपलाई मुक्त गराउन मित्रराष्ट्रका सेनाले नर्मन्डीमा अवतरण गरेको ऐतिहासिक घटनाको स्मरणमा आयोजित समारोहमा उनले स्वतन्त्रताको रक्षा निरन्तर प्रयासबाट मात्रै सम्भव हुने बताएका थिए ।
हेगसेथको अभिव्यक्ति ट्रम्प प्रशासनका उच्च अधिकारीहरूले युरोपको आप्रवासन नीतिमाथि गरेका पछिल्ला आलोचनामध्ये एक हो । यसअघि अमेरिकी उपराष्ट्रपति जेडी भान्सले पनि बेलायतमा भएको एक हत्या घटनालाई आप्रवासी संकटसँग जोडेर टिप्पणी गरेका थिए ।
अमेरिकी राष्ट्रपति डोनाल्ड ट्रम्पले पनि विगतमा युरोपेली देशहरूको आप्रवासन नीतिको आलोचना गर्दै अनियन्त्रित आप्रवासनका कारण युरोप समस्यामा परेको बताएका थिए ।
युरोपमा पछिल्ला वर्षहरूमा आप्रवासन प्रमुख राजनीतिक मुद्दाका रूपमा स्थापित भएको छ । विभिन्न देशमा कडा आप्रवासन नीति समर्थक राजनीतिक दलहरूको प्रभाव बढ्दै गएको छ ।
संयुक्त राष्ट्रसंघका अनुसार सन् २०१५ मा भूमध्यसागर पार गरेर युरोप प्रवेश गर्ने आप्रवासीको संख्या १० लाखभन्दा बढी पुगेको थियो । यद्यपि पछिल्ला वर्षहरूमा समुद्री मार्गबाट हुने आगमन केही घटेको तथ्यांकले देखाएको छ ।
यसैबीच, ट्रम्प प्रशासनले अमेरिका भित्र पनि कडा आप्रवासन नीति लागू गर्दै अध्यागमन तथा भन्सार प्रवर्तन निकाय (आईसीई) मार्फत व्यापक पक्राउ अभियान सञ्चालन गरिरहेको छ ।
