०४ साउन २०८३, सोमबार
फिफा विश्वकप २०२६ अन्तर्गत समूह ‘एच’को एक नाटकीय र अत्यन्तै मनोरञ्जक खेलमा दुई पटकको पूर्व विश्वविजेता उरुग्वे नवप्रवेशी टोली केप भर्डेसँग २–२ गोलको रोमाञ्चक बराबरीमा रोकिएको छ ।
अमेरिकाको फ्लोरिडास्थित मियामी स्टेडियममा सम्पन्न खेलमा दुवै टोलीले आफ्नो शुरूआती अग्रता जोगाउन नसक्दा अंक बाँड्न बाध्य भएका हुन् ।
खेलको २१औं मिनेटमा केप भर्डेका केभिन पिनाले फ्रिकिकमार्फत उत्कृष्ट गोल गर्दै टोलीलाई ऐतिहासिक अग्रता दिलाएका थिए । खेलको ४४औं मिनेटमा उरुग्वेका म्याक्सी अराजोले गोल फर्काउँदै खेललाई १–१ को बराबरीमा ल्याए । त्यसको लगत्तै, पहिलो हाफको इन्जुरी समयमा अगस्टिनले गोल गरेपछि उरुग्वेले २–१ को अग्रता बनायो ।
दोस्रो हाफमा केप भर्डेले पुनः खेलमा कमब्याक गर्यो । ६१औं मिनेटमा उरुग्वेका डिफेन्डर र गोलकिपरबिच तालमेल नमिल्दाको फाइदा उठाउँदै केप भर्डेका हेलियो भारेलाले गोल गरेर खेललाई २–२ को स्थितिमा पुर्याए ।
बल पोजिसन र सट्स प्रहारमा केप भर्डेभन्दा करिब दोब्बर अघि रहे पनि त्यसपछि उरुग्वेले थप गोल गर्न सकेन । खेलको अन्तिम समयमा केप भर्डेले केही 'कम्पोजर' गुमाउँदा जित्ने सुवर्ण अवसर गुमाए तापनि पूर्वविजेता देशविरुद्ध उसले निकालेको यो नतिजा आफैँमा उल्लेखनीय र ऐतिहासिक बनेको छ ।
यो नाटकीय खेलको समाप्तिसँगै समूह ‘एच’ मा २ खेलबाट ४ अङ्क जोड्दै स्पेन शीर्ष स्थानमा सुरक्षित छ । उरुग्वे र केप भर्डेले समान २ खेलबाट २–२ अङ्क जोडेका छन् । गोल अन्तर शून्य रहे पनि प्रहार गरेको गोल सङ्ख्याका आधारमा उरुग्वे दोस्रो र केप भर्डे तेस्रो स्थानमा छन् । साउदी अरेबिया भने १ अङ्कका साथ तालिकाको पुछारमा छ ।
यो नतिजाले समूह चरणका अन्तिम खेलहरूलाई निकै रोचक र निर्णायक मोडमा पुर्याइदिएको छ । अब आगामी शनिबार बिहान हुने खेलहरूमा केप भर्डेले साउदी अरेबियाको सामना गर्नेछ भने उरुग्वेले युरोपेली च्याम्पियन स्पेनसँग प्रतिस्पर्धा गर्नेछ ।
साउदी अरेबियाविरुद्ध मैदान उत्रँदा केप भर्डेको टोली उच्च मनोबलका साथ 'लास्ट ३२' मा पुग्ने लक्ष्यमा हुनेछ । साउदी अरेबियालाई पराजित गर्न सकेको खण्डमा केप भर्डे शीर्ष दुईमा रहँदै नकआउट चरणमा पुग्ने बलियो सम्भावना छ।
अर्कोतर्फ, बलियो उरुग्वेका लागि भने विश्वकपको प्रारम्भिक चरणबाटै बाहिरिने खतरा बढेको छ । अर्को चरणको यात्रा सुरक्षित गर्न उरुग्वेलाई स्पेनविरुद्ध स्पष्ट जितको आवश्यकता पर्नेछ, यद्यपि खेल बराबरी भएमा पनि अन्य समीकरणका आधारमा उसको सम्भावना रहन सक्छ ।
यदि केप भर्डेले साउदी अरेबियाविरुद्ध उरुग्वेले स्पेनविरुद्ध निकाल्ने नतिजाभन्दा राम्रो परिणाम निकाल्न सक्यो भने केप भर्डे समूहको दोस्रो स्थान कब्जा गर्दै इतिहास रच्ने दाउमा रहनेछ ।
