अमेरिका र इरानबीच जारी युद्धलाई पूर्णविराम लगाउन र एउटा अन्तिम सम्झौतामा पुग्न स्विट्जरल्याण्डको लुसर्नमा दुई देशका उच्च अधिकारीहरूबीच प्रत्यक्ष वार्ता भइरहेको छ।

अघिल्लो हप्ता भएको ६० दिने प्रारम्भिक सहमतिपछि सुरु भएको यो पहिलो चरणको प्रत्यक्ष वार्ता स्थानीय समयअनुसार आइतबारदेखि सुरु भई रातभर जारी रहने अपेक्षा गरिएको छ।

वार्तामा संलग्न एक वरिष्ठ अमेरिकी कूटनीतिज्ञका अनुसार छलफल मुख्यतया हर्मुज जलसन्धि पुनः सञ्चालन गर्ने, दक्षिणी लेबनानमा युद्धविराम कार्यान्वयन गर्ने र इरानको आणविक कार्यक्रमका प्रमुख बुँदाहरूमा केन्द्रित रहेको छ।

वार्ताको नेतृत्व अमेरिकी टोलीबाट उपराष्ट्रपति जेडी भान्सले गरिरहेका छन् भने उनलाई जाभियद कुश्नर र विशेष दूत स्टिभ विट्कोफले साथ दिइरहेका छन् । इरानी टोलीको नेतृत्व मोहम्मद बगेर गालिबाफ र विदेशमन्त्री अब्बास अराक्चीले गरिरहेका छन्।
अमेरिकी उपराष्ट्रपति जेडी भान्सले राष्ट्रपति डोनाल्ड ट्रम्पले दुई देशबीचको सम्बन्धमा "नयाँ पाना पल्टाउन" चाहेको बताएका छन् । उनले यदि इरान क्षेत्रीय अस्थिरता र आणविक हतियारको महत्त्वाकांक्षा त्याग्न तयार भएमा अमेरिका सम्बन्धलाई मौलिक रूपमा परिवर्तन गर्न इच्छुक रहेको स्पष्ट पारे। यद्यपि, सोही समयमा राष्ट्रपति ट्रम्पले सामाजिक सञ्जालमार्फत चेतावनी दिँदै लेबनानमा हिजबुल्लाहले समस्या सिर्जना गर्न नरोके इरानमाथि फेरि कडा प्रहार गर्ने धम्की दिएका छन् । 

ट्रम्पको धम्कीको जवाफ दिँदै इरानी वार्ताकार गालिबाफले अमेरिकी धम्कीको कुनै प्रभाव नपर्ने भन्दै इरान आफ्नो कदम चाल्न तयार रहेको बताएका छन् । यसअघि इरानले हर्मुज जलसन्धि बन्द गर्ने घोषणा गरेको भए तापनि म्यारिटाइम ट्र्याकिङ डेटाका अनुसार केही जहाजहरूले अझै पनि उक्त मार्ग प्रयोग गरिरहेको देखिएको छ।