फिफा विश्वकप २०२६ को पहिलो अन्तिम १६ को खेलमा मोरक्कोले सह-आयोजक क्यानडालाई ३-० को फराकिलो अन्तरले पराजित गर्दै क्वार्टरफाइनलमा आफ्नो स्थान सुरक्षित गरेको छ।

ह्युस्टन स्टेडियममा आइतबार बिहान सम्पन्न दोस्रो हाफमा उत्कृष्ट प्रदर्शन गर्दै मोरक्कोले अन्तिम ८ मा आफ्नो स्थान सुरक्षित गरेको हो ।
खेलको पहिलो हाफ गोलरहित बराबरीमा सकिए पनि निकै तनावपूर्ण र आक्रामक देखिएको थियो। रेफ्री माइकल ओलिभरले पहिलो हाफमै ६ वटा पहेँलो कार्ड देखाउनु परेको थियो।

क्यानडाले पहिलो हाफमा खेलमा निकै राम्रो पकड बनाएको थियो र टानी ओलुवासेयीले गोल गर्ने सुनौलो अवसर पनि पाएका थिए, तर उनीहरूले त्यसलाई सदुपयोग गर्न सकेनन्।

दोस्रो हाफमा भने मोरक्को पूर्ण रूपमा फरक लयमा देखियो। खेलको ५० औं मिनेटमा अजेदिन उनाहीले अचरफ हाकिमीको सुन्दर पासमा गोल गर्दै मोरक्कोलाई १-० को अग्रता दिलाए। क्यानडाले बराबरी गोलका लागि निकै मिहिनेत गरे पनि ८२ औं मिनेटमा उनाहीले नै व्यक्तिगत दोस्रो गोल गर्दै मोरक्कोको अग्रता दोब्बर बनाए। यस गोलका लागि ब्राहिम डियाजले उत्कृष्ट असिस्ट प्रदान गरेका थिए।

खेलको इन्जुरी समयमा सोफियाने राहिमीले तेस्रो गोल थपेपछि क्यानडाको पुनरागमनको सबै आशा समाप्त भयो।

क्यानडाका गोलकिपर म्याक्सिम क्रेपाउ पनि अन्तिम समयमा गोलका लागि मोरक्कोको पेनाल्टी बक्ससम्म पुगेका थिए, तर त्यो प्रयास सफल हुन सकेन।

यो जितसँगै मोरक्को विश्वकप २०२६ को क्वार्टरफाइनलमा पुग्ने पहिलो टोली बनेको छ। अब उसले सेमिफाइनल प्रवेशका लागि पाराग्वे वा फ्रान्समध्ये एक टोलीको सामना गर्नेछ। सह-आयोजक क्यानडा भने प्रतियोगिताबाट बाहिरिएको छ ।