२४ जेठ २०८३, आइतबार
काठमाडौं, ७ माघ — अस्ट्रेलिया भ्रमणमा रहेको इंग्ल्यान्डले पाँच एकदिवसीय शृंखलाको तेस्रो खेलमा १६ रनको विजयसँगै शृंखलामा ३–० को विजय प्राप्त गरेको छ ।
सिड्नीमा आइतवार सम्पन्न दिवारात्रि खेलमा टस हारेर ब्याटिङ गरेको इंग्ल्यान्डले ६ विकेटको क्षतिमा ३०२ रन बनायो । जवाफमा अस्ट्रेलियाले निर्धारित ओभरमा ६ विकेट गुमाएर २८६ रन मात्र बनाउन सक्यो ।
१८९ रन बनाउँदा ६ विकेट गुमाएको इंग्ल्यान्डले अन्तिम १० ओभरमा १०० रन बनाउँदै ३०२ रनको चुनौतीपूर्ण स्कोर खडा गरेको थियो । इंग्ल्यान्डका लागि विकेटकीपर ब्याट्स्म्यान जोस बट्लरले ८३ बलमा ६ चौका र चार छक्काको मद्दतले नटआउट १०० रन बनाएका थिए ।
उनलाई क्रिस वोक्सले ३६ बलमा ५३ रन बनाएर साथ दिएका थिए । यी दुईले सातौं विकेटका लागि ११३ रनको साझेदारी गरेका थिए ।
अस्ट्रेलियाका लागि जोश हेजलवूडले दुई अनि कमिन्स, जाम्पा, स्टोइनिस र मार्शले एक एक विकेट लिए ।
जवाफमा ब्याटिङ गरेको अस्ट्रेलियाले नियमित अन्तरमा विकेट गुमाउँदै गएर पराजय बेहो–यो । आरोन फिन्चले ५३ बलमा ६२ रन बनाए भने स्टोइनिसले ५६ र मिचेल मार्शले ५५ रन बनाए ।
इंग्ल्यान्डका लागि मार्क वूड, क्रिस वोक्स र अब्दुल रशिदले दुई दुई विकेट लिए ।
शतक प्रहार गरेका जोस बट्लर म्यान अफ द म्याच भए ।
चौथो एकदिवसीय एडलेडमा शुक्रवार खेलिनेछ ।
टेस्ट शृंखला गुमाएर हतास भएको इंग्ल्यान्डका लागि एकदिवसीय शृंखला जीतले नैतिक बल दिएको छ ।
