३० जेठ २०८३, शनिबार
काठमाडौं, २१ माघ — चीनले अमेरिकालाई शीतयुद्धकालीन मानसिकताबाट बाहिर आउन चेतावनी दिएको छ । आफूहरूको सैन्य शक्तिलाई पनि अमेरिकाले कम आँक्न नहुने उसको भनाइ छ ।
वाशिङटनले शुक्रवार आफ्नो आणविक क्षमता बढाउने सम्बन्धमा जारी गरेको दस्तावेज सार्वजनिक भएपछि चीनले यो टिप्पणी गरेको हो ।
चीनको रक्षा मन्त्रालयले आइतवार सार्वजनिक गरेको बयानमा भनिएको छ, ‘शान्ति र विकासको मुद्दा स्थायी हो । ठूलो आणविक क्षमता भएको अमेरिका जस्तो देशले शान्तिको सिद्धान्तमा काम गर्नुपर्छ ।’
अमेरिकाको साना परमाणु हतियार विकसित गर्ने प्रयासलाई रुसले पनि निन्दा गरेको छ । रुसका अनुसार, अमेरिकाको यो प्रयासले विवाद बढाउँछ । अनि यसले दुई देशबीचको तनाव पनि चर्काउने सम्भावना रहन्छ ।
फेब्रुअरीको शुरूआतमा अमेरिका सेनाले जारी गरेको नयाँ सुरक्षानीतिमा चीन र रुसलाई प्रतिगामी शक्ति (रिभिजनिस्ट पावर) बताइएको छ । अमेरिकी अधिकारीहरूका अनुसार, आणविक हतियारहरूमार्फत अमेरिकाले रुसको खतरा सामना गर्नसक्छ ।
चीनले अमेरिकामाथि गलत मूल्यांकनको आरोप लगाएको छ । चीन र अन्य मुलुकको बहानामा अमेरिका सधैं आणविक हतियार विकासमा लागेको चीनको भनाइ छ ।
चीनको रक्षा मन्त्रालयले भन्यो, ‘अमेरिकाले शीतयुद्धकालीन मानसिकता त्याग्ने हामी आशा गर्छौं । चीन र अमेरिकाबीच सुसम्बन्ध कायम भएमा प्रशान्त क्षेत्रमा स्थिरता कायम रहन्छ ।’
एजेन्सी
