महेन्द्रनगर, २७ माघ– सन्यासी (जोगी) चन्द्र गिरीको हत्या गरी फरार भएका अर्का जोगी नारायण चौधरीलाई प्रहरीले पक्राउ गरेको छ । 

कञ्चनपुरको कृष्णपुर नगरपालिका वडा नं.–४ मा रहेको प्रसिद्ध बनदेवी मन्दिरमा सन्यासीका रुपमा बस्दै आएका नारायणले आफूसँग बस्दै आएका अर्का जोगी चन्द्र गिरीको हत्या गरेका थिए । उनीहरु दुईबीच सामान्य विषयमा विवाद भएको प्रहरीको भनाइ छ । 

चन्द्र गिरीको हत्या गरी फरार रहेका आरोपि नारायण चौधरीलाई कैलालीको अत्तरिया बजारबाट शनिबार बिहानै पक्राउ गरिएको ईलाका प्रहरी कार्यालय झलारीका प्रहरी नायव निरीक्षक मणि भट्टले जानकारी दिए । 

३२ वर्षीय नारायण चौधरीले ४५ वर्षका चन्द्र गिरीको टाउँमा चिर्पटले प्रहार गरेर हत्या गरेका थिए । त्यहाँ रहेका अन्य आधा दर्जन महात्मा (जोगी)हरु आरती गर्न व्यस्त रहेको बेला साँझ उनीहरु बीच एक–आपसमा झगडा भएको थियो । 

हत्या पश्चात नारायण चौधरी नजिकैको लालझाडी वन हुँदै फरार भएका थिए । उनको खोजीका लागि ब्यापक मात्रामा प्रहरी परिचालन गरिएको थियो । 

पक्राउ गरिएका नारायणलाई प्रहरीले हिरासतमा लिएर थप अनुसन्धान गर्ने जनाएको छ ।