काठमाडौं, १० फागुन– राष्ट्रपति विद्यादेवी भण्डारीले फागुन २१ गते संघीय संसद्को बैठक आह्वान गरेपछि संघीय संसद सचिवालयले प्रतिनिधिसभा र राष्ट्रियसभाका सांसदको शपथ फागुन २० गते नै गराउने तयारी गरेको छ ।

प्रतिनिधिसभा र राष्ट्रियसभाका सांसदको शपथ एकै दिन तर फरक फरक समयमा गराउने गरी तयारी गरेको संसद् सचिवालयले जनाएको छ । कानुनअनुसार दुईटै सभाको शुरुको अध्यक्षता सम्बन्धित सभाका ज्येष्ठ सदस्यले गर्नेछन् । सांसदलाई शपथ गराउनुअघि दुवै ज्येष्ठ सदस्यले राष्ट्रपतिसमक्ष शपथ लिनुपर्ने हुन्छ ।

प्रतिनिधिसभा निर्वाचन ऐन र राष्ट्रियसभा निर्वाचन अध्यादेशको अनुसूचीमा शपथको व्यहोरासहित ढाँचाको व्यवस्था गरिएको छ । प्रतिनिधिसभामा २ सय ७५ र राष्ट्रिय सभामा ५९ सदस्य छन् ।