धनगढी, २० फागुन– कार्यालय समयमा मदिरा सेवन गरी आपसमा कुटाकुट गर्ने कर्मचारीहरुलाई जनही एक–एक हजार रुपैयाँ जरिवाना गरिएको छ ।

फागुन १७ गते कार्यालय समयमा आपसमा कुटाकुट गरी होहल्ला गर्ने जिल्ला मालपोत र नापी कार्यालयका चार जना कर्मचारीसहित छ जनालाई जरिवाना गरिएको हो ।
 
मालपोत कार्यालयका नायव सुब्बा पूर्णानन्द जोशी, खरिदार ज्ञानेन्द्र ओझा, नापी कार्यालयका सर्वेक्षकद्वय विरेन्द्र सिंह र महादेव जोशीलाई कारवाही गरिएको जिल्ला प्रशासन कार्यालयले जनाएको छ । त्यस्तै लेखापढी कानून व्यवसायी नवराज जोशी र नापीका प्रयोत्गात्मक विद्यार्थी सागर कुवँरलाई पनि कारवाही गरिएको छ ।

उनीहरुलाई स्थानीय प्रशासन ऐन २०२८ को दफा (९) को (१) बमोजिम कारवाहीस्वरुप जरिवाना गरिएको प्रमुख जिल्ला अधिकारी गोविन्द रिजालले जानकारी दिए ।

आज (आइतवार) कार्यालयका प्रमुखसहित ती कर्मचारीहरुलाई बोलाएर सोधपुछ गरेको बताउँदै प्रजिअ रिजालले सत्यतथ्य खुलाई पठाउनको लागि सम्बन्धित कार्यालयको प्रमुखलाई पत्रचार समेत गरिएको बताए ।

कुटपिटको क्रममा नासु पूर्णानन्द जोशीको हात भाँचिएको छ । उनी वाहेक सबै जनालाई आज जिल्ला प्रशासन कार्यालयमा उपस्थिति गराइएको थियो ।

यसैबीच विभिन्न सञ्चारमाध्यमहरुमा घुस रकममा कुरा नमिल्दा मदिराको नशामा रहेका कर्मचारीहरु आपसमा रकमको हिसाबकिताब खोज्दै कुटपिट गरेकोे भनी आएको थियो । जसबाट ती कार्यालयसहित कर्मचारीहरुको व्यापक आलोचना हुनुको साथै घुसयाहा कर्मचारीहरुलाई कडा कारवाही गरिनुपर्ने आवाज उठिरहेको छ ।

घटनाको शुक्ष्म रुपमा अनुसन्धान जारी राखेको प्रजिअ रिजालको भनाई छ । जसका लागि जिल्ला प्रशाशन कार्यालयका कानूनी अधिकृत लोकमणि पाण्डेलाई घटनाको वास्ताविकता बुझी प्रतिवेदन बुझाउन निर्देशन दिइएको छ ।

फागुन १७ गते कार्यालय समयमा मदिरा सेवन गरी कुटपिट गरिरहहँदा उनीहरुलाई प्रहरीले वियर र रक्सीको बोतलसहित नियन्त्रणमा लिई छाडेको थियो ।