काठमाडौं, २५ फागुन– नेकपा माओवादी केन्द्रले प्रतिनिधिसभाको सभामुखको उम्मेदवार नेता कृष्णबहादुर महरालाई बनाउने निर्णय गरेको छ ।

शुक्रबार बिहान बसेको माओवादी केन्द्रको बैठकले यस्तो निर्णय गरेको प्रवक्ता पम्फा भुसालले लोकान्तरलाई जानकारी दिइन् । पार्टी अध्यक्ष पुष्पकमल दाहाल प्रचण्डको निवास ललितपुरको खुमलटारमा शीर्ष नेताको बैठक बसेको हो । 

सभामुखको उम्मेदावारी मनोनयन दर्ता आज हुँदैछ ।  एमाले र माओवादीबीच भएको भागबन्डा अनुसार सभामुख पद माओवादीको भागमा परेको छ ।

माओवादीभित्र सभामुखका लागि महराका अतिरिक्त नेताहरू देव गुरुङ, गिरिराजमणि पोखरेल, अग्निप्रसाद सापकोटा, हरिबोल गजुरेल, लेखराज भट्टदेखि पूर्वसभामुख ओनसरी घर्तीसम्म आकांक्षी थिए । तर, पार्टी अध्यक्ष पुष्पकमल दाहाल प्रचण्डले वरिष्ठ नेताहरू नारायणकाजी श्रेष्ठ र रामबहादुर थापा (बादल) लगायत नेतासँगको अनौैपचारिक छलफलपछि महरालाई अगाडि सार्ने निर्णयमा पुगेका थिए । सोही अनुसार आजको बैठकले महरालाई सभामुखको उम्मेदवार बनाउने निर्णय गरेको हो । 

यता एमाले अध्यक्ष एवं प्रधानमन्त्री केपी ओली सभामुखमा तत्कालीन संविधानसभा अध्यक्ष सुवास नेम्बाङलाई दोहोर्याउने मनस्थितीमा थिए । उनले नेम्बाङलाई सभामुखको जिम्मेवारी दिन माओवादीसँग अन्तिमसम्म पनि छलफल गरे । 
बिहीबार साँझ पनि ओली र माओवादी अध्यक्ष दाहालबीच प्रधानमन्त्रीनिवास बालुवाटारमा नेम्बाङको व्यवस्थापनको विषयलाई लिएर छलफल भएको थियो।