काठमाडौं २७ फागुन– राष्ट्रिय सभा अध्यक्षका लागि फागुन ३० गते हुने निर्वाचनका लागि सोमवार उम्मेदवारी मनोनयन हुँदैछ । 

माओवादी केन्द्रसँगको भागवण्डामा राष्ट्रिय सभाको अध्यक्ष नेकपा एमालेको भागमा परेको छ । जातीय सन्तुलन मिलाउन भन्दै राष्ट्रिय सभाको अध्यक्षमा परशुराम मेघी गुरुङलाई उम्मेदवार बनाउने तयारी गरेको छ । 

राष्ट्रपति, प्रधानमन्त्री र सभामुख लगायतका पद एउटै समुदायको भएकोले राष्ट्रिय सभाको अध्यक्षमा जनजाती मुलको व्यक्तिलाई प्राथमिकता दिने एमाले माओवादीको तयारी छ । 

यसअघि दुई पटक सांसद भइसकेको र संसदीय मामिलाको बिषयमा जानकार भएकोले गुरुङ नै राष्ट्रिय सभाको अध्यक्ष बन्ने प्रवल सम्भावना रहेको एमाले स्रोतले बतायो । एमालेका शीर्ष नेताहरुबीच गुरुङो बिषयमा छलफल भएको स्रोतले बतायो । 

२०४८ र २०५६ सालको प्रतिनिधि सभा चुनावमा गुरुङ शंखुवासभाबाट वियजी भएका थिए । राष्ट्रिय सभा अध्यक्षका लागि पहिलो पटक सांसद बनेका गणेश तिमिल्सिना र खिमलाल भट्टराईले पनि रुची देखाएको एमाले स्रोत बताउछ ।