काठमाडौं, २७ मंसिर– दोस्रो संविधानसभा चुनाव हुनुअघि तत्कालिन एमाओवादी प्रवेश गरेकी नायिका रेखा थापा पार्टी परित्याग गर्दै नयाँ पार्टीमा प्रवेश गर्न लागेकी छन् । उनी आज राजधानीमा आयोजित एक विशेष कार्यक्रमका बीच कमल थापा नेतृत्वको राप्रपामा प्रवेश गर्न लागेकी हुन् ।
यसअघि सो पार्टीमा चर्चित गायिका तथा समाचारबाचिका कोमल ओली प्रवेश गरेकी थिइन् ।
राप्रपा नेपालका केन्द्रीय सदस्य राजाराम बर्तौलाले थापा राप्रपामा प्रवेश गर्न लागेको बताए । राप्रपा स्रोतका अनुसार उनैलाई पार्टी प्रवेश गराउनका लागि पार्टीले इन्द्रेणी फुडल्याण्डमा सोमबार दिउँसो कार्यक्रमको आयोजना गरेको छ ।
माओवादीले गरेको उपत्यका बन्दका क्रममा प्रचण्डसँग नाचेर चर्चामा आएकी थापा पछि २०७० जेठ ४ मा माओवादीमा प्रवशे गरेकी थिइन् । पछि उनले चलचित्र विकास बोर्डको अध्यक्ष बन्नका लागि दौडधूप गरेपनि नपाएपछि पार्टीसँग असन्तुष्ट बन्दै आएको माओवादी स्रोत बताउँछ ।
त्यतिबेला माओवादीमा प्रवेश गर्दा रेखाले भनेकी थिइन्– एमाओवादी जनताको पार्टी भएकोले म पनि यसमा सम्माहित भएको हुँ । पार्टीले दिने जिम्मेवारी पूरा गर्न म तयार छु र यो पार्टीमा पार्टी प्रवेश गर्न पाउँदा खुसी लागेको छ ।
उनले अगाडि भनेकी थिइन्, ‘अहिले चलचित्रको पर्दामार्फत मात्र आम जनमानसमा पुग्न नसकिएको कारणले पार्टी प्रवेशबाट अब हरेक नेपाली जनताका घर घरमा गएर सेवा गर्ने चाहन्छु । नायिका हुँदा मनोरञ्जन दिए अब देश र जनतालाई सेवा गर्न चाहन्छु ।’
चलचित्र हिरोटबाट फिल्म नगरीमा प्रवेश गरेकी थापाले दर्जनौं हिट चलचित्रमा अभिनय गरेकी छिन् ।
तत्कालिन एमाओवादीमा प्रवेश गर्दै रेखा थापा । फाइल फोटो
