२२ जेठ २०८३, शुक्रबार
काठमाडौं, २१ चैत — भारतको महाराष्ट्रकी रुपाली मेश्रमले आफ्नो आँगनमा रहेको बाख्रोलाई खान आएको बाघलाई भगाउने क्रममा चोटपटक बेहोरेकी छन् ।
यी २३ वर्षीया युवतीले बाख्रो कराएको सुनेपछि घरबाहिर दौडेकी थिइन् ।
उनले एउटा लट्ठी लिएर बाघलाई हिर्काइन् । उनकी आमाले उनलाई घरभित्र तान्दै लगेर बचाइन् । आमालाई पनि चोट लागेको छ ।
आमाछोरी दुवैलाई सामान्य चोटपटक लागेको छ र अस्पतालबाट छुट्टी दिइएको छ । बाख्रो भने बाँचेन ।
आक्रमणको लगत्तैपछि मेश्रमले सेल्फी लिइन् । सेल्फीमा उनको अनुहार रगतले लत्पतिएको छ । अघिल्लो हप्ता भएको यो घटना बल्ल सार्वजनिक भएको हो ।
उनलाई उपचार गर्ने चिकित्सकले उनको उदाहरणीय बहादुरीको प्रशंसा गरे । तर बाघले उनलाई नटोक्नु उनको सौभाग्य भएको चिकित्सकको भनाइ छ ।
मेश्रमको टाउको, कम्मर, गोडा र हातमा चोट लागेको छ । तर ती सामान्य चोट हुन् र उनी अहिले पूरै ठीक भइसकेकी छन् ।
आमाको चोट पनि बिस्तारै भरिँदैछ ।
उनीहरूले वनरक्षकलाई बोलाएका थिए तर बाघ गएको आधी घन्टापछि मात्र रक्षक आइपुगेका थिए ।
उनीहरूको गाउँमा जंगली जनावरहरू प्रायः आइरहेका हुन्छन् किनकि गाउँ निकुञ्जनजिकै छ ।
बीबीसीबाट
