काठमाडौँ, २३ चैत–महानगरीय प्रहरी परिसर काठमाडाँैंले सामाजिक विकृति विरुद्धको कारवाही अभियानअन्तर्गत राजधानीमा जुवाडेहरूलाई पक्राउ गर्न थालेको छ । महानगरीय प्रहरी कार्यालय र परिसरले यस हप्ता गोकर्णेश्वर, गोंगबु नयाँबसपार्क, मित्रनगर, कुलेश्वर ह्वाइट र तारकेश्वरमा छापामारी ५० जनालाई जुवा खेलेको अभियोगमा पक्राउ गरेको छ । उनीहरूका साथबाट करिब १८ लाख ९० हजार रुपियाँ बरामद भएको छ । 

काठमाडौँ परिसर प्रमुख विश्वराज पोखरेलका अनुसार तारकेश्वर कैलाशटोलस्थित कोपिला अधिकारीको घरमा जुवा खेलिरहेको अवस्थामा पाँच लाख ३१ हजार रुपियाँसहित १७ जना र कुलेश्वर ह्वाइटस्थित अजयकुमार शाक्यको घरबाट दुई लाख रुपियाँसहित १७ जना जुवाडे पक्राउ परेका छन् । 

त्यस्तै, गोंगबुबाट पाँच लाख ९३ हजार रुपियाँसहित पाँचजना र गोकर्णेश्वरस्थित पूर्ण लामाको घरबाट छ लाख ४० हजार रुपियाँसहित ११ जना जुवाडे पक्राउ परेका छन् । जुवा अखडाबाट पक्राउ परेका अधिकांश महिलाहरूका श्रीमान् वैदेशिक रोजगारीमा गएको पाइएको छ । 

‘श्रीमान् विदेशमा दुःख गर्ने, तर श्रीमती अर्कै व्यक्तिसँग टाँसिएर जुवा अखडामा मस्ती गर्ने गरेका छन्” परिसर प्रमुख पोखरेलले भन्नुभयो । जुवा खालमा नगद खर्च गर्नेमा पुरुषभन्दा महिलाको संख्या बढी देखिएको छ । जुवाका अखडाबाट एक आपसमा चिनजान हुने र जुवा जित्नेले मनोरञ्जन गराउने भन्दै महिलाहरूलाई राति डिस्को, डान्स र दोहोरीमा लैजाने गरेको पाइएको छ ।, गोरखापत्रमा खबर छ ।